Шорык
2021 ий тыланда куштылгыжак огеш лий. Шуко событий тургыжланаш тарата. Но тиде – жаплан веле. Шыжым чылажат веран-верышкыже шинчаш тӱҥалеш. Телым тӱҥ верыш пашам огыл, а йӧратымаш кылым чоҥымашым луктыда. Ончыкылык пелашдам эше вашлийын огыдал гын, тиде 2021 ийыште лийын кертеш. Тыгак тиде ийын йӧратыме еҥда дене илышдамат кылден кертыда. Лишыл еҥда-влак дене кылым саемдыза.
Презе
Вий-куатда ташлыше лиеш. Те шкендам чыла ыштен кертшылан шотлаш тӱҥалыда. Тидыже карьер тошкалтыш дене кӱзаш, личный илышыште кылым саемдаш полшышаш. Кӱлеш наре огыда каналте гын, «йӱлен пытен» кертыда. Шошым-кеҥежым йолташда-влак дене умылыдымаш лектеш, очыни. 2021 ийыште тыланда чыла шотыштат пашам ворандараш йӧн лиеш. Кудыж гыч тӱҥалаш – шке рашемдыза.
Йыгыр
2021 ийыште тендам шуко паша да шагал огыл стресс вуча. Сандене чытышым да лыпландарыше эмым ончылгоч шапашлыза. Идалыкын икымше пелыштыже ятыр сомыл ӱмбакыда «камвозеш». Туге гынат август деч вара Ӱшкыж поро кумыланрак лиеш. Тиде идалык неле йодыш-влакым рашемдаш, ешым чумыраш, тукымым шуяш келшыше лиеш. Бизнесыште, пашаште сомылда ворана. Сусыргымо деч шекланыман.
Рак
2021 ийыште кугу кӱкшытыш шуын кертыда. Тендам вашталтыш, тӱрлӧ вучыдымо ситуаций-влак вучат. Йӧратыме еҥлан, ешлан тӱткышым шукырак ойырыман. Пелашда ушкалаш амалым пуаш огеш тӱҥал. Лишыл еҥда-влакын пеҥгыде эҥертышыштым шижыда. Идалыкын икымше пелыштыже «кугу» айдеме дене палыме лийын кертыда. Тудын тыланда окса дене кылдалтше йодышым рашемдаш полшаш йӧнжӧ лиеш.
Лев
2021 ийыште те шке кӧргыштыда кушшо вийым шижыда. Тыланда туге чучаш тӱҥалеш, пуйто уло тӱням утарен кертыда! Идалыкын икымше тылзылаштыже окса шотышто нелылык лектеш. Но тидым те вуйлатыше да коллегыда-влак дене ик ойыш шуын моштымыда дене сеҥеда. Тыгак йолташ-шамычын полышыштлан эҥерташ лиеш. Личный илышыште шонымашкыда шуын кертыда.
Ӱдыр
Те шошым да кеҥежым вий-куат ешаралтмым шижыда. Пашаште, бизнесыште сеҥымаш вуча. Тыгодымак нине пагытлаште паша сферым але паша верым вашталтен кертыда. А телым личный илышлан кугурак тӱткышым ойырыман, шукырак жапым еш дене пырля эртараш тыршыман. Йӧратымаш кылда чытышым да шкем шот дене кучен моштымым йодеш. Тазалыкым эскерыман. Поснак вирусан чер авалтыме деч шекланыман.
Виса
Тыланда Ӱшкыж ятыр оҥай йӧным темла. Но чылаж денак пайдаланен огыда керт, сандене ойырен налаш логалеш. Окса ден еш илыш пуйто «ваш шогалыт». Кеч-кудыж дене кылдалтше нелылыкым рашемдыме годым поснак тӱткӧ лийза – ончыкыжым тиде пӱрымашышкыдат вашталтышым пуртен кертеш. Тазалыклан кугурак тӱткышым ойырыман, келшен толдымо койыш-шоктыш деч утлаш тыршыман. Паша верым вашталтен кертыда.
Скорпион
Йогым сеҥеда гын, кугу кӱкшытыш шуын кертыда. 2021 ий куанымат шагал огыл конда, изишак тургыжланашат амалым ышта. Шкем кидыште кучаш тӱҥалыда гын, пашаште ӱчашымаш деч утледа, мӧҥгыштыдат вашкыл сай лиеш. Кылмен черланыме деч шекланыза. Ӱдырамаш-шамычлан ласка илыш дене илаш куштылгыжак огеш лий. Молан манаш гын нунын нерген тӱрлӧ манеш-манешым ойлыштмаш нелылыкым луктын кертеш.
Пикшызе
2021 ийын икымше пелыже ласка лиеш. Сандене отпускым налын да путешествийыш тарванен кертыда. Родо-тукымда, лишыл еҥда-влак дене кыл пеҥгыдемже манын шонеда гын, яра жапым утларакше мӧҥгыштӧ да нунын дене пырля эртараш тыршыза. Идалыкын озаже його да «халявщик» манме-шамычым огеш йӧрате. Тиде амал дене пашам чотак ышташ логалеш. Личный илышыште сюрприз-влак лийын кертыт.
Ирказа
Идалык ласка лиеш манын каласаш неле. Профессионал пашаште нелылык-влак вашлиялт кертыт. Оксам арымеш налме, юридический документ-влакым подписатлыме годым поснак тӱткӧ лийман. Кеч-момат сайын шонен-висен ыштеда гын, кеҥеж вашеш илышда сай велыш вашталташ тӱҥалеш. «Куштылго» оксалан ида ужалалт. Уке гын мом шке пашада дене сулен огыл, тудым Ӱшкыж пеш вашке поген налын кертеш.
Вӱд йоктарыше
Шушаш ий тыланда пиалан лийшаш. Шуко паша вуча, но каналташат йӧн лектеш. Карьер тошкалтыш дене кӱзен кертыда – вуйлатыше должностьым айлаш темлымашым кеҥеж кыдалне налаш ямде лийза. Тыгак паша сферым да паша верымат вашталтен кертыда. Но тидым ыштыме деч ончыч чылажымат сайын шоналтыман да висыман, уке гын шуко йомдарыме лӱдыкшӧ уло. Тазалыкым пеҥгыдемдыме нерген мондыман огыл.
Кол
2021 ийыште тендам ятыр сеҥымаш вуча! Тыгак шканда ятыр уым пален налыда. Тендам ынде нимо ӧрыктарен огеш керт манын шонеда гын, йоҥылыш лийыда – илышыштыда тыгайже шагал огыл лиеш. Тендан нерген манеш-манешымат колтедыл кертыт. Но мом ыштет – сеҥымашыш шушо еҥ эреак кӧранымашым да ойлаш амалым луктеш. Оксада палынак шукемеш. Тидыже шийвундым кондышо ешартыш «памашлан» кӧра лиеш.
Любовь КАМАЛЕТДИНОВА ямдылен