Тачысе лаштыкнан унаже – У Торъял район Изаҥа ялын ӱдыржӧ Светлана АЛГАЕВА. Тудо Оршанкысе шуко профилян колледжыште тӱҥалтыш класслаште туныктышылан тунемеш. Ӱдыр ӱмаште Марий Эл вуйлатышын стипендиатше лийын.
— Светлана, тунеммаштат, мер илышыштат чолгалыкым ончыктет. Чыла вере шукташ вийым кушто муат?
— Самырык годым нойымым от шиж. Тугакшат кызытсе илышыште эре ончыко ошкылман, тӱрлӧ пашам ыштен ончыман. Тыгак, мыйын шонымаште, шкалан гына сай лийже манын ышташ ок лий. Еҥланат полшыман.
— Шымлыме проектлам возет. Тидыже илышыште иктаж-кузе полша?
— Колледжыште эртыше ик мероприятийлан ямдылалтме годым кугу шымлымашым эртаренам. Туныктышылан пӧлеклалтше Россий да Совет жапысе 23 фильмым онченам, нунын образыштым анализироватленам. Мылам эн чот «Внимание, черепаха!», «Доживём до понедельника» кинофильм-влак келшеныт. Тушто туныктышо поро, умылышо, чыла могырымат шотан айдеме семын ончыкталтын. Тылеч ончыч совет фильмым ончен омыл, а кызыт нунын сайлан туныктымыштым умылем. Ты кино-шамычым ончен, мый шкежат могай туныктышо лиям манын, шуко шоненам. Тиде ончыкылык профессийыштем шкем муаш, сай пашаеҥ лияш полшышаш.
Тыгак каласынем, проектым чыланак возен огыт керт, тидлан тунемман. Ты пашалан мыйым Людмила Дмитриевна Пушкарёва туныктен. Тудлан кугу таум каласем.
— Тыйын шонымаште, кӧ тыгай туныктышо?
— Йоча-влак дене пашам ышташ мылам келша, но мыйым тыгак актерын профессийже сымыстара. Колледжысе «Вдохновений», «Шонанпыл» ансамбльлаш коштам. Мурашат, кушташат ик семын келша. Спорт денат кылым кучем. Волейбол, футбол дене модам. Сӱретлашат йӧратем. Но туныктышын профессийже чонемлан лишылрак. Тыгодым туныктышо — иканаште актер, сӱретче, спортсмен, кидмастар. Педагог икшывылан чыла моштымашыжым пуа. Шкеже мом мошта – тудлан туныкта. Тидыже нимо деч шерге. Садлан туныктышак лиям манын шонем.
— Форумлашкат коштат?
— Оршанке районысо Кугу Ӧрша школышто эртыше Марий самырык тукымын слётыштыжо мумо йолташем-шамыч дене кызытат кылым кучем. Тушто возымо проектым илышыш шыҥдараш шонена. «Worldskills Russia» конкурсышто вийым тергынем ыле, вет тыге ме мастарлыкнам шуарен кертына, вес студентын опытшым шке пашаштына кучалташ йӧн уло. Школышто туныкташ тӱҥалам гын, йочалан жапым шукырак ойырыман, тудлан келге шинчымашым пуаш тыршыман, нунылан ака, ава лияш тыршыман. Чаманен каласем, форумлашке да монь коштмым ик татлан мондаш логалеш.
Лидия ШАБДАРОВА мутланен.
(Фотом еш альбом гыч налме.)
