Курыкмарий районысо Когосолаште 25-ше гана «Игнатьев лудмаш: курыкмарий-влак Российын историй да тӱвыра кумыдыкыштыжо» шанче-практик конференций эртен.
Ты гана тудо Шочмо элым аралыше-влакын идалыкыштлан пӧлеклалтын. Эшежым Никон Игнатьевын шочымыжлан тений 130 ий темын. Тиде амал дене Краснодар гыч курыкмарий сылнымут классикын Краснодар гыч кугезе уныкаже Павел да тудын пелашыже Анна мероприятийыш лӱмын толыныт. Конференций деч ончыч классикын лӱмжым нумалше Салымсола краеведений тоштер ончылно шогышо памтяникше воктеке пеледыш аршашым пыштеныт. 30 ий ончыч почылтшо тоштер писательын кодымо сылнымут поянлыкшым веле огыл, тыгак курыкмарий калыкын историйже ден йӱлажым аралыше рӱдерлан шотлалтеш.
Пленар погынымаште йоҥгалтше кум докладчик кокла гыч иктыже Москосо М.В.Ломоносов лӱмеш кугыжаныш университетын, тыгак Россий науко академийын Н.Н.Миклухо-Маклай лӱмеш Этнологий да антропологий институтшын шанче пашаеҥже, историй науко кандидат Герман Устьянцев лийын. Кодшо ийын Моско кугыжаныш университетын этнологий кафедрыж гыч курыкмарий кундемыште экспедиций дене лийме паша лектышыж дене палдарен.
Икмыняр книга презентаций лийын. Юл кундем кугыжаныш технологий университет гыч ялозанлык науко кандидат Евгений Гончаров Курыкмарий районын да Козьмодемьянскын краеведческий атласыштым ямдылен. М.Шкетан лӱмеш Марий кугыжаныш национальный драме театр гыч Марина Почтенева ден курыкмарий драме театр гыч Светлана Васканова «Профессионал театр – курыкмарий-влакын тӱвыра поянлыкше» альбом-книгам чумыреныт.
5 секцийыште 70 доклад йоҥгалтын. Курыкмарла лектын шогышо «У Сем» журналлан 95 ий теммылан пӧлеклалтше «йыргешке ӱстел» йыр мутланымашкат шукын ушненыт.
Кугу Отечественный сарын, кызытсе жапысе локальный конфликтлан участникыштын пӱрымашыштлан пӧлеклатше доклад-шамычат йоҥгалтыныт. Когосолаште эртыше шанче мероприятий нерген МарНИИЯЛИ-н воткыл лаштыкыштыже увертаралтеш.
Светлана Носова
Снимкыште: Никон Игнатьевын шарныктышыже.
М.Почтеневан фотографийже.
