Шорык
Тиде арнян оксада ешаралтеш, сандене мӧҥгылан кӱлшӧ арверым налаш йӧнда лиеш. Воктеныда улшо еҥ-влак дене шуко мутланаш логалеш. Чын да шоя ятыр уверым пален налыда. Палыдыме еҥ-влаклан шке илышда нерген ида каласкале.
Презе
Еҥ-влак дене шкем тыматлын кучен моштымыда кеч-могай неле йодышымат куштылгын рашемдаш полша. Тӱжвал сыным вашталташ кумылда лектеш. Тидым ыштымыда дене еҥ-влаклан утларак келшаш тӱҥалыда. Йолташ-шамыч дене оксалан кӧра кылда локтылалт кертеш.
Йыгыр
Тиде арнян каналтымыда моткочак шуаш тӱҥалеш. Иктаж шып верыш каяш йӧнда уло гын, тидын дене пайдаланыза да утларак жапым шкет эртараш тыршыза. Вуйлатышыда дене умылыдымаш лектын кертеш. Тидыже тендан нерген ала-могай шоя уверым колтымылан кӧра лиеш, очыни.
Рак
Те йолташда-влак дене шуко мутланаш тӱҥалыда. Кумылым нӧлтышӧ сюрпризлан ямде лийза. Адакшым шукертсе шонымашдат шукталтеш. Тиде кугу премий, пӧлек, лотерей дене модын налмаш, у еҥ дене палыме лиймаш, моло лийын кертыт.
Лев
Тендам карьер шотышто куанле жап вуча. Талантда да моштымашдалан келшен толшо у паша верым муаш шоненда гын, тыгай йӧн кызыт лектеш. Ешартыш пашамат ышташ тӱҥал кертыда. Неле йодышым рашемдаш йолташда ден палымыда-влакын полышыштлан эҥерташ темлалтеш.
Ӱдыр
Ятыр у еҥ дене палыме лийыда. Нунын коклаште тендам шуко улан туныктен кертше еҥат вашлиялтеш. Арнян икымше пелыштыже ушкалымаш шижмаш авалтен кертеш. Арня мучаште окса дене кылдалтше йодышым рашемдаш логалеш.
Виса
Тендан ала-мом вашталтымыда шуаш тӱҥалеш. Пиалеш, шонымашда шукталтеш. Тыге пашаштыда кушкаш у йӧн-влак лектыт, а личный илышыштыда тиде у йолташ дене вашлиймаш лиеш, очыни. Сандене ончыкылык шотышто тургыжланышаш уке.
Скорпион
Тиде арнян шӱмбелда дене кылда тунар кумылым нӧлтышӧ лиеш – тыгайже коклаштыда пытартыш жапыште шижалтынат огыл. Мужыраҥаш, венчаялташ келшыше арня. Икшыве-шамычлан кугурак тӱткышым ойырыман. Парымым пӧртылташ йӧнда лиеш.
Пикшызе
Тендан мӧҥгыштат, паша верыштат чылажымат шотыш кондаш, арулыкым эскераш кумылда лектеш. Тыге илышышкыда у шӱлышым пуртеда, сай велыш вашталтышланат ямде улмыдам ончыктеда. Лишыл еҥда дене лекше умылыдымашым кораҥдыза.
Ирказа
Шукертсек вашлийше мужыр-влак лачшымак тиде арнян официально ушнен кертыт. Ешан-влакымат ятыр куанле тат вуча. Палыдыме еҥ-шмычлан шке секретдам почаш ида вашке. Пашам кычалше-влак арнян кокымшо пелыштыже чоныштлан келшыше паша верым муын кертыт.
Вӱд йоктарыше
Тиде арнян ешыштыда ласкалык озаланаш тӱҥалеш. Тыгак тендан деке уна-влак толын кертыт. Тиде кумылдам эшеат нӧлталеш. Арнян икымше пелыштыже окса роскотыш пуреда. Арня мучаште иктаж-кушко миен толын кертыда.
Кол
Тыланда тиде арнян лишыл еҥда-влак дене шуко мутланаш логалеш. Тыге те чыла гаяк уверым палаш тӱҥалыда да тидыже кеч-могай неле йодышымат писын рашемдаш полша. Романтике шӱлышан ятыр вашлиймаш вуча. Нуно кумылдам чотак нӧлталыт.
Ӱпым пӱчкаш тарваненда гын
25 май. Тиде кечын ӱпым пӱчкаш огеш темлалт – ышташ шонымо пашада вес жапыш кусаралт кертеш. Натуральный гай тӱсыш чиялтеда гын, оксада ешаралтеш.
26 май. Таче ӱпым пӱчмӧ вий-куатым ешараш полша. Кӱлешан айдеме-влак дене палыме лийнеда гын, ӱпдам ошалге тӱсыш чиялтыза.
27 май. Ӱпым пӱчкыда гын, ешартыш оксам налыда, тазалыкда пеҥгыдемеш. Чиялтеда гын, ешыште але пырля пашам ыштыше-влак коклаште умылыдымаш лектын кертеш.
28 май. Ӱпым пӱчмӧ пашаште кугу кӱкшытыш шуаш, чиялтыме утларак мотор лияш полшат.
29 май. Илышыште нимо уда ынже лий манын, таче ӱпым пӱчман огыл. Чиялташат огеш темлалт.
30 май. Таче ӱпым пӱчкыда гын, тӱрлӧ уда да чер деч утледа. Натуральный гай тӱсыш чиялтеда гын, кумылда нӧлталтеш.
31 май. Тиде кечын ӱпым пӱчмат, чиялтымат ойго, уда деч кораҥаш полшат да ласкалыкым «пӧлеклат».
Л.КАМАЛЕТДИНОВА
