ШИНЧЫМАШ КУГОРНЫШТО

25 январь – Тачанан да Студент-влакын кечышт

Тыге ойлат вузлаште да ссузлаште  тунемше-влак, вет студент жапыште чылажат оҥай. Лач сессий годым нунылан шокшым кергалтен пашам ышташ перна.  Но тунемме  тургымым самырык тукым кажне гана веселан мучашла, вет 25 январьыште ӱдыр-рвезе-влак Тачанан да Студент-влакын кечыштым палемдат. 

 Марий Элыште ты кечылан пӧлеклалтше икмыняр мероприятий  эрта. Поснак кугу программым ПГТУ ямдылен. 24 январьыште «Юлтехын» 2-шо корпусыштыжо, шнуй мученице Татианан домовой храмыштыже, всенощный бдений лиеш. Тушко Йошкар-Олан да Марий Элын митрополитше Иоанн мия.

А 25 январьыште  вузын тӱҥ корпусыштыжо шкешотан квест модыш, уштодыш марафон, кулинар мастарлык конкурс, дартс дене таҥасымаш лийыт. Пайремым «Гуттенбергын курилкыже» проектын заседанийже мучашла. Тушто «Студенчестве: социальный вий, «креативный» класс, пытыше вид?» ден «Университетын ончыкылыкшо: XXI  курымышто кӱшыл образованийын чолгыжмыжо да нужналыкше» темылан пӧлеклалтше «йыргешке ӱстелыш» чумыргат. Йошкар-Оласе медколледжын студентше-шамычат ойыртемалтше программым ямдыленыт.

А Чебоксарыште «Юл кундемын Татьянаже-2018» конкурс эрта. Тушто республикнан чапшым МарГУ-н студенткыже Т.Веденкова арала. Тидын нерген «Куштымаш чонем почын пуаш полша» материалыште  12-шо лаштыкыште лудын кертыда.

Л.ШАБДАРОВА.
Снимкыште: Йошкар-Оласе медколледжын ӱдыр-рвезыже-влак
Студент-влакын кечыштым оҥайын эртарыме нерген мутланат.

М.Скобелевын фотожо.

Опубликовать в Одноклассники

Добавить комментарий