Творческий шӱлышан самырык еҥ-влаклан «Таврида» форум тений июль тӱҥалтыштак почылтын да октябрьыште гына мучашлалтеш.
Участник-влак радамыште тиде гана Юл кундем кугыжаныш университетын студенткыже Светлана Домрачева лийын. Ӱдыр теве могай шонымашым каласыш: «Форумышто мый икымше гана лийынам. Тудо Крымыште, Капсель бухтышто, почылтын. Тенийысе мероприятийын тӱҥ темыже пандемийлан кӧра тӱвыра сферыште вашталтыш-влак дене кылдалтше лийын. Эксперт-влак дене пырля ме тӱрлӧ йодышым каҥашенна, у технологий нерген мутланенна. «Таврида» ончыкылык илышлан йӧным ыштыше площадке. «Литератур да медия» антишкол кышкарыште мый шканем моткоч шуко уым пален налынам. Мый молыланат тиде формушто кеч ик гана илышыште лийын ончаш темлем, молан манаш гын тушто кажныже шканже верым муэш. Программе пеш поян, ик татат яра огеш эрте. Адакшым «Таврида» тиде форум гына огыл, а гыч ямдылыме проектым илышыш шыҥдарыме да грантым сеҥен налаш йӧн».
Г.КОЖЕВНИКОВА
