Сочи олаште эртыше III Евразий конгрессын площадкыштыже Марий Элым вуйлатыше Юрий Зайцев ден Индийысе «Рус Эдьюкейшн» компанийын президентше Сайед Камруззаман вашлиймашым эртареныт, ончыкылык вашкыл нерген каҥашеныт.
Юрий Зайцев палемден: Марий Элын ончыл университетлаштыже республикысе веле огыл, йот элла гыч студент-влаклан сай качестван образованийым пуаш чыла йӧн уло. «Мемнан вузын выпускникше-шамыч уло элна мучко, тыгак ӧрдыжтӧ кӱлешан улыт. Пытартыш жапыште Йошкар-Ола университет олаш савырнен. Рӱдолаштына Россий гыч веле огыл, йот элла гыч ӱдыр-рвезе-влак тунемыт. Каласыман, республикыште рушла мутланен моштыдымо студент-влаклан кӱлеш пособий ойыралтеш, нунын дене кӱкшӧ квалификациян педагог-шамыч пашам ыштат. Ончыкыжым ты направленийым утларак вияҥдаш да тунемше-влакын чотыштым кугемдаш палемденна», – каласен тудо.
Сайед Камруззаманын мутшо почеш, Марий Элысе вузлаште шинчымашым погышо индий студент-влаклан образованийын качествыже келша. Тудо тӱрлӧ отрасльлан специалистым туныктен лукмо шотышто республикна дене вашкылым умбакыже вияҥдаш ямде улмо нерген ойлен. Вашлиймаш годым вуз ден «Русь Эдьюкейшн» компаний коклаште ойпидышым ыштыме.
Палемдыман, конгрессыште Россий Образований да науко министерствын стендыштыже «Приоритет-2023» стратегический программын участникше семын Марий кугыжаныш университетым ончыктымо.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен.
