Таче, 25 июньышто, Марий Эл вуйлатыше Александр Евстифеев РФ Конституцийыш вашталтышым пуртымо шотышто общероссийский йӱклымашке ушнен.
Йошкар-Олаште республикысе Мер-политике рӱдерыште верланыше 15-ше №-ан участкыш регион вуйлатыше пелашыже Юлия Леонидовна дене пырля миен.
— Тиде торжественный кече-влак веле огытыл, а Россий Конституцийыш вашталтышым пуртымо шотышто йӱклымаш — эллан исторический событий, — палемден Александр Евстифеев.
Марий Эл вуйлатыше республикыште илыше калыкым чолгалыкым да шке граждан позицийым ончыкташ ӱжын.
— Республикыштына эр годсек чолган йӱклат. Кызытеш Морко район эн ончылно, молыштат почеш огыт код, — каласен Александр Евстифеев.
Марий Эл вуйлатышын организаций да аналитике виктемжын уверже негызеш Л.КАМАЛЕТДИНОВА ямдылен
