Россий Федерацийын Науко да кӱшыл шинчымаш министерствыже «Образование» национал проект кышкарыште «увер ресурсым вияҥдыме тӱрлӧ мероприятийым эртараш «Россий Федерацийын кызытсе цифран туныктымо аланже» грант конкурсышто сеҥыше-влакым палемден.
8 направлений дене 144 йодмаш пурен. «Инженер паша, технологий да технический науко теме почеш онлайн-курслам ыштымаш» номинацийыштат 49 проект лийын. 8 сеҥыше кокла гыч эн ончылно Петр Великий лӱмеш Санкт-Петербургысо политехнический университет (1 вер), «МИФИ» Национал шымлыше ядерный университет (2 вер) да Юл кундемысе кугыжаныш технологий университет (3 вер) лийыныт.
«2017 ийыште университетыште Онлайн туныктымаш аланыште Юл кундемысе рӱдер «шочын». Тудо «Россий Федерацийын кызытсе цифран туныктымо аланже» проект кышкарыште ышталтын. Эртыше кум ийыште кугу паша шукталтын. Пандемий ятыр нелылыкым конден, ты жапыштак тудо цифран технологийлан виян шӱкалтыш лийын. Онлайн йӧн шинчымашым налмашым куштылемда. Ме шке палымынам, моштымынам тендан дене пайлаш ямде улына», — палемден «Юлтех» ректорын пашажым жаплан шуктышо Игорь Петухов.
Грант шийвундо (3 миллион утла теҥге) шушаш ийыште 8 онлайн курсым эртараш кучылталтшаш. Тидыже: «Проекционный черчений» (36 шагат), «Илыш лӱдыкшымылык» (108 шагат), «Сетевой технологийыш ушнымаш» (108 шагат), «JavaScript йылме дене программирований» (108 шагат), «Python-ышто программирований да вычислений-влакын йӧнышт» (108 шагат), «Инженер график» (108 шагат), «Увер технологий-влак» (108 шагат), «Python-ышто нейросетевой данныйын анализше да машина дене тунеммаш» (108 шагат).
Тиде сеҥымаш Россий вуз коклаште онлайн технологийым кучылтмо дене Юл кундем кугыжаныш технологий университетын ик эн ончылно улмыжым ончыкта.
О.МОШКИНА
