Шорык
Арня тӱҥалтыште шӱдыр-влак поснак кугу тӱткышым тазалыклан ойыраш темлат. Молан манаш гын черланыме лӱдыкшӧ уло. Тиде амал дене пашам утыждене чот ышташ тыршыман огыл. Утларак жапым канышлан ойырыман. Арня мучаште тазалыкда тӧрлана, оксада ешаралтеш.
Презе
Тыланда арнян икымше пелыштыже концертыш, спектакльыш каяш огеш темлалт. Амалже – нуно ты гана чонланда ала-молан огыт келше. Каныш кечыла вашеш икшывыда-влакын койыш-шоктышышт тургыжланаш амалым ыштат докан, сандене эскералтыза.
Йыгыр
Пашалан шуко жапым ойыраш кӱлмылан кӧра ешыште умылыдымаш лектын кертеш. Арнян кокымшо пелыштыже чылажат веран-верышкыже шинчеш. Ала-могай «кугу» еҥ дене палыме лийыда. Ончыкыжым тудо тыланда кугу полышым пуа, очыни.
Рак
Арня тӱҥалтыште палыме, пошкудо, лишыл еҥ-влак дене икте-весе кокласе кыл нелылыкым луктеш. Тидыже шке нерген манеш-манешым але шылтален ойлымым колмо дене кылдалтеш векат. Ты жапыште у шӱмбел дене палыме лияш огеш темлалт.
Лев
Шочмын да кушкыжмын корно правилым поснак тӱткын эскерыман. Уке гын йӧндымылыкыш логал кертыда. Оксам аныклен кучылтман. Сайын шоналтыде, сатум налаш тыршыман огыл. Каныш кечылаште улшо уда койышда-влак деч утлаш тӱҥалаш темлалтеш.
Ӱдыр
Арня тӱҥалтыште компьютерым, быт техникым ачалаш пуыман огыл. Йӧратыме еҥ дене умылыдымаш лектеш гынат, шкем тыматлын кучыза. Тунам вурседылмаш деч утледа. Каныш кечылаште иктаж пайремыш але мероприятийыш ӱжыт гын, пырля миен толза.
Виса
Шӱдыр-влак сусыргымо деч шекланаш темлат. Мӧҥгыштӧ кугу эрыктыме сомылым ышташ пижман огыл. Арня кыдалне тазалыкда начаремаш тӱҥалмым шижыда. Черланаш огыл манын, утларак канаш тыршыман. Тыгак мо дене гынат шке кумылдам нӧлташ тыршыза.
Скорпион
Уда шонымашан рвезе ден пӧръеҥ-шамычын «оптышышкышт» логалаш огыл манын, ӱдыр, ӱдырамаш-влаклан арня тӱҥалтыште кафе ден клублашке коштман огыл. Тыгак ты жапыште шӱдыр-влак интернет гоч палыме лияш огыт темле.
Пикшызе
Ончыч палемдыме планда вашталт кертеш. Тидыже мӧҥгыштӧ иктаж-мо пудыргымо але иктаж вес туткар лийме дене кылдалтеш, очыни. Тыгак лишыл еҥда-влак нунылан тӱткышым шагал ойырымылан ӧпкелалташ тӱҥалыт. Арня мучаште уна-влакым вучыза.
Ирказа
Тыланда шочмын да кушкыжмын документ дене кылдалтше сомылым шукташ огеш темлалт. Молан манаш гын тыршымыда арам лийын кертеш. Еҥ-влак дене кажне мутым шонен кутырыман. Шылталыме деч шекланыза. Уке гын вашеш ятыр уда шомакым колыда.
Вӱд йоктарыше
Иктаж-кушко каяш билетым налаш тарваненда гын, вучалташ темлалтеш, вет икмыняр жап гыч тудым ятырлан шулдынрак налын кертыда. Окса дене кылдалтше йодышлан кугу тӱткышым ойырыман. Шукырак жапым еш, родо-влак дене эртараш тыршыза.
Кол
Арня тӱҥалтыште таҥасымашлашке ушныман огыл – сусыргымо лӱдыкшӧ уло. Лекше пӱсӧ йодыш-влакым пелаш дене каныш кечыла вашеш каҥашыман. Тунам ик ойыш писын шуын кертыда. Пошкудо, лишыл еҥ-влак дене сӧрасаш келшыше жап.
Ӱпым пӱчкаш тарваненда гын
21 февраль. Тиде кечын ӱпым пӱчман огыл – тыланда ала-мом моткочак шергаканым йомдарен кертыда. Могай тӱс чонланда келша, кумылдам нӧлта, тугайыш гына чиялташ темлалтеш.
22 февраль. Таче ӱпым пӱчкыда гын, илышда кужемеш. Шкендан гай тӱсыш чиялтеда гын, «кӱлешан» еҥ-влакым лишемдеда.
23 февраль. Ӱпым пӱчкаш келшыше кече огыл. Ӱпым чиялташ але уке – шке паледа.
24 февраль. Ӱпым пӱчмӧ пиалым, шийвундым ешараш полша. Чиялташ огеш темлалт.
25 февраль. Таче ӱпым пӱчмылан кӧра уто нелытым погымо лӱдыкшӧ уло. Ӱпым натуральный гай тӱсыш гына чиялтыман.
26 февраль. Тиде кечын ӱпым пӱчмӧ тӱжвал сыным эшеат сӧралракым ышта. Ӱпым чиялтенат кертыда.
27 февраль. Ӱпым пӱчкаш келшыше кече огыл. Тыгодым тудым кеч-могай тӱсыш чиялташ лиеш.