Кажне ийын майыште кумшо рушарнян СПИД деч колышо-влакым шарныме тӱнямбал кече палемдалтеш. Тудо ВИЧ/ СПИД чер дене орланыше-влакым умылымо, нунылан полшымо, тыгак илыш гыч кайыше-влакым шарныме символ семын аклалтеш. 2018 ийыште тиде кече «Эртышым шарналтен, ончыкылыклан ямдылалтын» девиз дене эрта.
Таче Российыште ВИЧ-инфекциян 944000 еҥ ила, тымарте 276660 черле колен. Черланыме амал тӱҥ шотышто иммунодефицит дене кылдалтын.
Марий Элыштат сӱрет моткоч начар, молан манаш гын чер ий еда шарлен толеш. ВИЧ-инфекцийын случайжым республикнан кажне районыштыжо регистрироватлыме, но Волжск олаште поснак шуко.
Республикысе СПИД-рӱдерын врачше-влак таче ВИЧ-инфекциян 1408 еҥын (ты шотыштак 14 йочан) тазалыкшым эскерат. Эпидемий историйыште регионыштына 424 еҥ ВИЧ да 105 еҥ СПИД деч коленыт.
14-20 майыште Российыште «Стоп ВИЧ/ СПИД» акций эрта. Тудын кышкарыштыже шинчымашым пуымо тӧнежлаште, паша коллективлаште да шуко моло вере тиде теме дене тӱрлӧ мероприятий: интернет-урок, семинар, ӱчашымашым тарватыше «йыргешке ӱстел», ВИЧ-лан тестирований, усталык паша конкурс, спорт таҥасымаш-влак да молат эртат.
Таче антиретровирус терапий полшымо дене ВИЧ-инфекциян еҥ-влакын илыш качествыштым арален кодаш йӧн уло, тидланже улыжат врачын темлымыжым шуктыман да шкем кучен моштыман.
ВИЧ-ын антителаже уло-укем Йошкар-Оласе Келшымаш уремын 95-ше пӧртыштыжӧ верланыше СПИД-рӱдерыште кумылан кажне еҥ терген кертеш. Регистратурын теелефонжо: 63-05-80, ӱшан телефон: 23-20-44.
М.ИВАНОВА.
