Марий Эл Республикын Молодежный парламентшым ыштымылан 15 ий темын. Тидын лӱмеш кушкыжмын Йошкар-Олаште, Калык-влакын келшымаш пӧртыштышт, кугу мероприятий эртаралтын.
Погынышо-влаклан эн ончычак парламентын шочмо историйже нерген видеороликым ончыктеныт. А вара тидын нергенак тудын кураторжо Наталья Козлова каласкален. Палдарымыж почеш, 2009 ий мартыште «Единая Россия» партийын Марий региональный отделенийжын политсоветше тудын пелен молодежный палатым ыштыме нерген положенийым пеҥгыдемдыме нерген пунчалым луктын. Апрельыште политсовет Молодежный палатын конкурс гоч ойыркалымашым эртыше 31 еҥан спискым пеҥгыдемден. Эше тылзе гыч Молодежный палате ден Кугыжаныш Погын коклаште вашкыл нерген ойпидышым подписатленыт. Тиде ийынак 24 декабрьыште Кугыжаныш Погын Молодежный парламентым ыштыме нерген пунчалым луктын. Тушко 23 еҥым пуртеныт. 2010 ий 26 январьыште тудын икымше заседанийже лийын. 15 ий жапыште молодежный парламентаризм школ гоч 750 утла ӱдыр-рвезе эртен.
Мероприятийыште Кугыжаныш Погын председатель Михаил Васютин, республикын внутренний политике, верысе самоуправленийым вияҥдымаш да юстиций министр Антон Мирбадалев йыргешке лӱмгече дене саламленыт, ойыртемалтше-влаклан наградым кучыктеныт.
– Регионын политический илышыштыже те кӱлешан ужашыже лийында да ончыкылык лидер-влакым куштымаште кугу рольым модыда. А эше Молодежный парламент мемнан республиклан кадрым ямдыла (кузница кадров), – каласен Михаил Зиновьевич.
Нунын деке тыгак Россий Федерацийын субъектше-влакын кугыжаныш кучем законодательный органышт пеленысе Молодежный парламент-влакын ассоциацийыштын еҥышт ушненыт. Нуно видеосаламлымашым колтеныт.
Икымше гыч нылымше созыв Молодежный парламентын еҥже-влак, тыгак кызытсе созывын парламентшын председательже Мария Дорогова шуктымо пашашт нерген каласкаленыт.
Мероприятий мучаште участник-шамыч йыргешке ӱстел мутланымаш семын йӧным кучылтын, шке шонымашышт дене пайлалтыныт.
Любовь Камалетдинова
Фотом Кугыжаныш Погынын сайтше гыч налме
