Марий Элын Тазалыкым аралыме министерствыжын 21 октябрь эрдене увертарымыж почеш, пытартыш суткаште регионысо стационарла гыч паремше 97 пациентым мӧҥгӧ колтымо, тыгодымак 71 черлым эмлалташ пыштыме. Тыге, таче эрдене республикысе 10 инфекционный стационарыште чылаже 887 гражданым у коронавирус инфекций деч эмленыт, ты чот гыч 174 пациент неле состоянийыште лийын, 14 черле шодым искусственно вентилироватлыме йӧн дене шӱлен, 380 еҥлан кислород кӱлын.
«Коронавирус: статистика» сайтын данныйже почеш, пытартыш суткаште Марий Элыште Covid-19 дене эше 55 еҥын инфицироватлалтмыжым официально регистрироватлыме. Тыге, пандемий пагытыште у коронавирус инфекций дене чылаже 5631 еҥ черланен, 4647 пациент паремын, 61 черле колен.
Аралыза шкендам да лишыл еҥда-влакым!
М.ИВАНОВА
