УВЕР ЙОГЫН

100 кече гыч – икымше «вияш линий»

100 кече гыч – икымше «вияш линий»

Александр Евстифеевым Марий Эл Республик вуйлатышын пашажым шуктышылан шогалтымылан 14 июльышто 100 кече темын. Тидын вашеш 13 июльышто тудын дене икымше гана «вияш линий» эртаралте.

Вияш эфир

Ты гана «вияш линий» ик шагат наре шуйныш. А тылеч ончыч еҥ-влак тургыжландарыше йодышыштым телекомпаний ден печатный изданий-влакын редакцийышкышт, тыгак Viber и WhatsApp гоч колтеныт. Чылаже 2,5 тӱжем йодыш пурен. «Россия 24» телеканалыште лийын.  Ты жапыштак «Регион 12» каналыште да  marimedia.ru ден potokmedia.ru сайтлаште ончыкталтын.

Эфирыште пуымо икымше йодыш тыгай ыле: «Эше апрельыштак правительствын заседанийыштыже те республикын космический парымже, Марий Эл панкрутыш шушаш состоянийыште улмо нерген ойленда ыле. Те тушеч лекме могай корным ужыда?»

А.Евстифеев тыге вашештыш:

— Икымше йодыш экономике денак кылдалтше лиеш манын мый умыленам. Экономика чылажымат рашемда. Республикын парымже — 14 миллиард теҥге. Тиде утларакше коммерческий банк-влаклан пӧртылтышаш окса. А эше процентыштым тӱлыман. Тиде – республикын идалыкаш пел бюджетше. Мом ышташ тӱҥалына? Россий контрольно-счетный палатын тергымашыжын иктешлымашыжым вучена. Роскотнам эскераш тӱҥалына. Кредитым коммерческий огыл, а кугыжаныш банк-влак деч налмашке куснена. Финанс министерствын палемдымымыж почеш, тиде 140 миллион теҥгем аныклаш полша. Бюджетник-влак шке оксаштым налыт.

Корно нерген йодышым пуымо годым ик социальный кылыште видеороликым ямдыленыт. Тушто ик самырык ача коляске дене пулвуй даҥыт марте вӱдыштӧ шога.

— Проблемым рашемдаш кӱлеш. Корным эре тӧрленак шогыман. Тыгай марте шуктыман огыл. Тидлан 52 миллиард теҥге окса кӱлеш. Тыгай окса республикыште уке. Но мом ышташ лиймым шонена, рашемдена. Тӱҥжӧ – качестве. Кокымшо – кучылташ налме материал. Тудым шулдыракын да ак  шергештме годым огыл, а волымо годым налман. Тыге оксам аныклыман,- мане.  

Ленин лӱмеш тӱвыра полат ончылнат «телекӱварым» ыштеныт ыле. Но тушко чумыргышо-влак путырак кӱлешан, чот тургыжландарыше йодышым пуышт манаш огеш лий. 

Эфир жапыште регион вуйлатышын пашажым шуктышо 10 наре йодышлан вашештыш. Тышеч кокытшым социальный сетьла тудо шкеже ончылгоч ойырен налын ыле да вашмутым пуыш.

Кӧ йодышым колтен гын, иктат тӱткыш да вашмут деч посна огеш код. Кажныжым шымлат манын сӧрышт.

— Мыйым «вияш линийыш» эше ӱжыт манын ӱшанем. Пуымо йодышлаште могай проблемым тарватыме – нуно рашемдалтшаш улыт. Тышкак ме шуаш тыршена, — палемдыш Александр Евстифеев.

Мутланымаш мучаште тыгай эфир тылзылан ик гана эртаралташ тӱҥалеш, вес гана августышто лиеш манын ойлышт.  

Тунамже эфирыш эшеат пӱсӧ да тургыжландарыше йодыш-влакым луктыт манын ӱшаныме шуэш. Уке гын ты гана эртыше «вияш линийыште» пуымо икмыняр йодышыжат, вашмутшат у огытыл ыле. Южыжым эфирыш пурташ огыл гынат, лиеш ыле. Сандене вес гана у да палыдыме шукырак лиеш манын ӱшаныме шуэш.  

Любовь Камалетдинова.

 

Опубликовать в Одноклассники

Добавить комментарий