Росий журналист ушемын Марий Элысе пӧлкажым ончыкыжымат «Пенсионер» ден «Семейная газета» савыктыш-влак редактор Оксана Старикова вуйлаташ тӱҥалеш.
Тыгай ӱшаным республикысе журналист-влак кодшо арня мучаште пӧлкан отчёт да сайлымаш конференцийыштыже ыштеныт.
Такшым устав почеш вуйлатышым 5 ийлан сайлат. Пандемий пагытыште чылан пырля вашлияш йӧн шагалрак лийынат, санденжат погынымаш пеш кумыл дене эртен. Оксана Старикова эртыше пагытыште ворандарыме пашам иктешлен. Шуко оҥай да пайдале мероприятий лийын. Кажне ийын эртыше республикысе журналист-влакын фестивальыштак мом шога! А ончылий гын тудым эше икшыве-влак дене пырля эртараш тӱҥалыныт. Теплоход дене ийын коштмаш, тӱрлӧ мастер-класс, районлаште вашлиймаш лийыныт… Журналист-влаклан йокрокланашышт тугакшат жап уке. Пытартыш ийлаште ветеран-шамычлан материальный полышым утларак еҥлан пуаш тӱҥалмымат сай велым палемдыман.
Кодшо ийын паша радамыш эпидемий ятыр вашталтышым пуртен. Икмыняр палемдыме мероприятий эртаралтде кодын. Туге гынат организаций ты ийын шке радамжым 255 еҥ гыч 280 марте кугемден кертын. МЭТР телеканалын журналистше-влакат ты ийын ушемыш ятырынак пуреныт…
Санденжат организацийын пашажым сайлан шотленыт да у вуйлатышылан ончычсыжымак сайленыт. Тыгак ревизионный комиссийын отчётшым пеҥгыдемдымеке, тудын да у правленийын составыштым сайлыме. Тылеч вара организацийыш пурышо савыктыш вуйлатыше-влакын паша опытышт дене палдарыше икмыняр доклад йоҥгалтын. Ончыкылан ыштышаш паша нергенат мутланеныт. Шернур сыр заводым вуйлатыше Владимир Кожанов дене вашлиймашат оҥайын эртен.
С.НОСОВА
