УВЕР ЙОГЫН

«Ӱдырамашын пӱрымашыже – элын историйже»

Ӱдырамаш-влакын тӱнямбал пайремышт вашеш пӱтынь элнан чыла гаяк кумдыштыжо мероприятий-влак эртеныт.

Иктыже 4 мартыште Марий Турек районышто лийын. Тиде – «Ӱдырамашын пӱрымашыже – элын историйже» IX форум.

Погынышо-влакым саламлаш район ден администраций вуйлатыше, депутат, моло уна миеныт. Нуно ӱдырамаш-влакын кумылыштым поро мут дене нӧлтеныт, пеледыш аршашым, южыштлан тӱрлӧ кӱкшытан наградым кучыктеныт.

Умбакыже районыштышт эртыше «Марий Турек районын ӱдырамаш-героиньыже-влак» теме дене лийше икымше муниципал просветительский конференцийым иктешленыт. Тидым ышташ мут Марий Турек муниципал район администраций вуйлатышын алмаштышыже, «Союз женщин России» ушемын районысо отделенийжын председательже Галина Пехпатровалан пуалтын. Тудо ойыртемалтше ӱдырамаш-влакым тӱрлӧ номинацийыште палемден.

Мутлан, «Марий Эл дене иктаҥаш» номинацийыште Новопавловский поселкышто илыше Рашида Газимовна Газимовам ойырен саламленыт. 100 ияш тиде ковайын илыш корныж денат кӱчыкын палдареныт.

Сеҥымашлан 75 ий темме вашеш «Из одного металла льют медаль за бой, медаль за труд» юбилейный медальым, шарнымашан пӧлекым да пеледышым тылыште тыршыше ӱдырамаш-влаклан: Нина Васильевна Комелиналан, Анастасия Петровна Куимовалан, Раиса Павловна Рупасовалан, Наиля Бараевна Хадеевалан, Ольга Ивановна Бусыгиналан – кучыктеныт.

Марий Турек районышто Марий республикын сулло туныктышыжо, Октябрь революций орден дене палемдалтше, марий калык мурым йоҥгалтарыше, «Савак кундем» калык ансамбльын чолга участницыже Ида Ивановна Крыловам кызытат порын шарнат да кажне ийын, ынде луымшо гана, тудын лӱмеш муниципал премий дене шке пашаштышт кӱкшытыш шушо ойыртемалтше еҥ-влакым палемдат. Тиде премийым тений Марий Турек поселкысо Йоча сымыктыш школын преподавательже, «Корни» калык семӱзгар образцовый оркестрын художественный вуйлатышыже Валентина Арсентьевна Камышева,  Вениамин Свинин лӱмеш районысо рӱдӧ эмлымверын родильный отделенийжын заведующийже, акушер-гинеколог Галина Васильевна Мамаева, Лом ялысе йочасад вуйлатыше Дина Александровна Овчинникова суленыт.

«За верность профессии» номинацийыште гын 8 еҥым палемденыт. Нунын коклаште туныктышо, зоотехник, кинде пыштыше, врач… улыт.

«Ӱдырамаш – легенде» номинацийыште кумдан палыме землячкыштым, Э.Сапаев лӱмеш опер да балет театрын артисткыже Светлана Сергеевна Сушкинам, спортсменке-ечызе Анастасия Ивановна Осиповам палемденыт.

Нине ӱдырамаш-шамыч кокла гыч кажныж нерген видеофильм-презентацийым ончыктеныт да саламленыт. Вашешыже нунат тауштымо шомакым ойленыт.

А теве «Мемнан жапын героиньыже» номинацийыште кызыт тӱрлӧ сферыште тыршыше да шке пашаштым сайын шуктышо, чолга  ӱдырамаш-шамычым ойырен налыныт.

Пайрем мучаште погынышо ӱдырамаш-влакым районысо пӧръеҥ-шамыч саламленыт. Уке, сценыш лектын огыл, а экран гыч, видеофильм гоч. А рвезе-шамыч форумыш толшо кажне ӱдырамашлан пеледышым кучыктеныт.

Тыгай мероприятийын кӱлешлыкше моткоч кугу. Тушто чолга еҥ-влак, иквереш чумырген, ыштыме пашаштым иктешлат, шуктышашым палемдат да, ончыкыжым эшеат чот тыршаш кумылаҥын, мӧҥгышкышт пӧртылыт. Тыге илыш умбакыже шуйна…

Любовь КАМАЛЕТДИНОВА

Д.Кочергинын фотожо

Опубликовать в Одноклассники

Добавить комментарий