ЙОШКАР-ОЛА

«Яндар ий йымалне колланат волгыдо» але Рӱдӧ олана У ийлан ямдылалтеш 

У ий вашеш Йошкар-Олана койын вашталтеш. Тений Ленин площадьыште кум сӱретче – Павел Попов, Валерий Вадимов, Стас Горбунов – ий гыч ӱшкыжым (тудыжо египет сфинксым ушештара), Шкетан театр ден Спасский башньын макетыштым ыштат. Тиде пашам арня мучаште пытарышаш улыт.

         Рӱдолаш У ий шӱлышым пурташ Йошкар-Оласе администрацийын пашаеҥже-влак пайрем кожым шогалтылаш тӱҥалыныт, чылаже тидлан шӱдӧ пушеҥгым ямдыленыт. Тыгак йоча-влаклан индеш катокым вераҥдаш палемдыме. Ялыште пӱртӱс «полша» гын, олаште вес сӱрет  – катокшымат, лум курыкшымат шкак ыштыман. Тиде сомыл, мутлан, Сомбатхей микрорайонышто южо вере шукталтын. Тыгак Сеҥымаш паркыште, Киров уремысе 9-ше №-ан пӧрт пелен (тӱҥалтышым Артур Земцов ыштен), Воин-Интернационалист-влакын уремыштышт верланыше 22-шо «а» №-ан  пӧрт воктене (волгыдо гына ок сите), Петров уремыште каток-шамыч ямде улыт, тушто лумым эрыкташ гына кодеш. Чыла тиде пашаш калыкат ушна. Теве Изи Какшан эҥер ӱмбалне,  Марий самырык театр ваштареш, пенсионер Василий Косарев Сергей эргыже да моло дене пырля коньки  дене мунчалташ йӧратыше-влаклан ий ӱмбач лумым эрыктеныт, ты верым «Мемнан каток» лӱмденыт.

– Ынде витле ий коньки дене мунчалтен омыл, – ойла пенсионер.  – А кызытше молан шогалынам, шонеда? Яндар ий пеш келшыш. Байкалысым  ушештара. Тений Изи Какшан вӱд пел метрлан кылмен. Мый Йошкар-Олаштак шочынам, – ойла В.Косарев. – Гортопышто пушеҥгым обрабатыватлыше цехым вуйлатенам, эргым Москошто пашам ышта, кызытше – дистанций йӧн дене, сандене Йошкар-Олаш толын. Мыскараче койышан, ончыза, кузе возен сакен: «Яндар ий йымалне колланат волгыдо». Ме эн ончыч 50 метран корным лум деч эрыктенна гын, а варажым кок оҥган катокым ыштенна. Ик оҥгыжо – 250 метр. Такшым,  калык каныме кечылаште  изижге-кугуже тышке толыт. Ий ӱмбалне ваке рожым шӱтенам, тудым «йомакысе Емелян рожшо» манына. Тушеч вӱдым налам да лумыш кышкалам, тудыжо кылма, варажым лум ора гыч «телевизорым» ыштынем. Каток покшелне ужар кожым шогалташ шонена. Семмастар-влакат толын кертыт ыле, но нунылан волгалтараш электротул кӱлеш. Чыладамат свежа южыш лекташ ӱжам!

М.СКОБЕЛЕВ

Авторын фотожо

Опубликовать в Одноклассники

Добавить комментарий