Лач тыгай девиз дене Российысе Марий самырык тукым слёт эрташ тӱҥалеш. Ты гана ӱдыр-рвезе-влак Морко район Унчо кундемыште 8-13 июльышто чумыргат. Тенийысе слётын ойыртемже нерген кумданрак тудын ик организаторжо Алёна Иванова каласкала.
— Алёна, черетан слёт молан пӧлеклалтын?
— Кажне гана ме тунеммашлан кугу верым ойыраш тыршена, проект паша дене палдарена. Мутлан, кузе шке пашам тӱҥалаш да тудым виктарен шогаш. Тений – Тӱп калык йылме-влакын тӱнямбал идалыкышт да Театр идалык. Тидым шотыш налын, утларакше усталык аланыште тыршыше ӱдыр-рвезе-влакым чумырынена. Тыгодым тӱрлӧ социал да бизнес проектым илышыш шыҥдарыше-влакым ӱжына. Слётын ик эн тӱҥ шонымашыже — марий самырык тукым коклаште лидер-влакым кушташ.
Ме марий-влак тӱрлӧ кундемыште илена, тӱрлӧ пашам шуктена, эсогыл йылмынат изиш ойыртемалтеш, но ме ик калыкын шочшышт улына. Тыгодым тӱвыра поянлыкнам, ойыртемалтше йӱланам арален кодена да тукым гыч тукымыш шуена.
— Мыняр еҥ ушнен кертеш?
— Чылаже 100 наре еҥ погынышаш, 18 гыч 35 ияш марте. Марий Элнан кажне районжо да марий-влакын тӱшкан илыме Башкортостан, Удмуртий, Татарстан республикла, Виче, Угарман, Свердлов область, Пермь да моло кундем гыч. 28 июнь марте йодмашым налына. «Молодежь России» автоматизироватлыме увер системыште регистрацийым эртыман да анкетым возыман, «Российысе марий самырык тукымын ХI слётшо» мероприятийым ойырен налман.
— Молгунамсе семын слётын программыже оҥай, очыни?
— Лекций, семинар, тренинг, вашмутланымаш, «йыргешке ӱстел», экскурсий, мастер-класс-влакым эртараш палемдыме. Марий ончылъеҥ да вуйлатыше-влак дене вашлиймаш лиеш. Туныктышо семын Озаҥ ола гыч сценарист, режиссер, психолог Антон Шутов, Ханты-Мансийск гыч психологий науко кандидат Нина Айварова, Марий кугыжаныш универститет гыч филологий науко доктор Любовь Абукаева, «Опора» мер ушемын президентше Сергей Дождиков да молат лийыт.
— Тений Унчо села Финн угор тӱнян культур рӱдывержылан шотлалтеш. Санденак, очыни, Марий самырык тукым слётым тушто эртараш палемдыме?
— Тыге. Ме Унчо кундем дене кугешнена. Тушто ожнысо ятыр йӱла аралалт кодын, да тушто илыше-влак тудым тукым гыч тукымыш шуят.
А.БАЙКОВА
