Марий Элыште вольыкым теле гоч ашнен лукмо тургым икшырымын эрта.
Республикысе район-влак кодшо кеҥежым-шыжым теле гоч вольыклан пукшышаш кургым, тидын шотыштак пырчым, ситышын шапашленыт ыле. Тидлан кӧра кызыт курго шотышто чӱдылык ик вереат ок палдырне, да тидыже вольык продукт лектшым кугемден толаш негызым ышта. Тыге тиде кечылаште тӱшка ден фермер озанлык-влак суткаште 298-300 тонн шӧрым лӱштат. Тидыже ӱмашсе тыгаяк жап дене таҥастарымаште 9 чоло тоннлан шукырак.
Район-влакын таҥасымаштышт У Торъял велысе вольык ончышо-шамыч ойыртемалтыт. Тыште чумыр гаяк шӧрым «Первый май» артель ямдыла. Тысе доярке-влак суткаште кажне ушкаллан шотлымаште 21,9 килограмм дене шупшылыт. Тидыже кодшо ийысе деч 1,5 килограммлан шукырак. Кокымшо ден кумшо верыште Медведево ден Параньга район-влак улыт. Тыштат лӱштыш ӱмашсе деч 2,2-2,4 килограммлан шукырак. А пӱтынь республикым налаш гын, кажне ушкал деч суткаш кокла лӱштыш 16,9 килограммыш шуын. Кодшо ийысе тыгаяк пагытым 1 килограмм чолылан эртен кайыме.
Но ушкал ончычсо ийласе семынак шагалем толеш. Тидыже эн ончычак ӱмаште Медведево районысо «Тепличный» акционер ушемын панкрутыш лекмыже да тудын чыла вольыкшым, тидын шотыштак ушкалжым, ужален пытарымылан кӧра лийын. Тыге тиде районышто ушкал иканаште 513 вуйлан шагалемын, а пӱтынь республикыште – 414 вуйлан. Курыкмарий, Шернур да Советский районлаштат ушкал кажныштыже 20-21 вуйлан шагалемын. Тыгодымак Кужэҥер ден У Торъял район-влак 59-66 вуйлан ешареныт.
В.Смоленцев.
