Октябрь мучаште Волжский районышто Шайрамбал ден Полатсола яллам ушышо 1714 м кужытан 8 м лопкытан автомашина корным почыныт.
Мый гын корным айдеме капкылысе вӱргорно дене таҥастарем. Вӱргорно уло, тудо таза гын веле кид-йол тарванылеш, вуй шона… Вӱргорно пыта – чыла пыта. Корно денат тыгакак.
Шке жапыштыже, поснак «Шайра кундем» тӱшка паян озанлык улмо годым, Сотнур кундемысе чыла гаяк ялышке корно лийын. Шунан, ошман, лавыран, лакылан, но лийын! Амалже: кажне гаяк ял пелен я шорык, я ушкал, я сӧсна ферме-влак, я идым пашам ыштеныт. Тушко эр гыч кас марте тӱрлӧ технике кудалыштын. Тунам чыла илемыш ораван огыл гын, гусеницан трактор пурен кертын, сандене калыклан пум, шудым да монь кондымо шотышто азапланаш логалын огыл. Тӱшка озанлык шаланыме дене трактор-машина парк веле огыл, ял-влакым ушышо икмыняр корнат пытыш. Мутлан, Руш Шайра курык гыч Курыклӱваке волтышо корно ий еда ночкышто шун лапашыш, кукшышто шун чуҥгаш савырна. Тидлан кӧра Полатсолашкат корно петырна. Иктаж-кӧлан йӧсӧ лиеш, иктаж-кушко тул пижеш гын, ны «вашкеполыш», ны пожарный машина-влак полшаш миен огыт керт. Эсогыл колышо-влакым орваш але издерыш пыштен лукташ логалеш…
Кумданрак — «Марий Эл» газетын
2017 ий 4 ноябрьыште лекше номерыштыже лудын кертыда.
М. ИВАНОВА.
Авторын фотожо.
