Кеҥеж шумеке, шукышт отпускым налыт да тӱрлӧ верыш канаш каят. Марий мурызо, артист-влак канышыштым кушто эртараш шонат? Могай теҥызыш миен толмышт шуэш?
Андрей Яруков, М.Шкетан лӱмеш Марий национальный драме театрын артистше:
— Мландӱмбалне эн келге ерым — Байкалым — ик гана ужаш шоненам ыле, но… Кеҥеж канышым шочмо-кушмо ялыштем эртарем. Тушто отпуск жапыште ыштен шуктышаш пашам уло.
Татьяна Денисова, Марий Элын сулло артистше:
— Кажне кеҥежым иктаж-кушко, вес кундемыш, миен толмо шуэш. Ӱмаште, мутлан, Ялтыште «Шумбрат» фестивальыш миенам ыле. Тудо пеш келшен, сай шарнымашым коден. Кеч-кушко каяш эреак окса кӱлеш, но мордва калык дене эше икгана вашлиймем шуэш ыле.
.
Александр Бирюков, Марий самырык театр вуйлатыше:
— Кажне ийын Геленджикыш коштына, тушто родо-тукымна дене вашлийын, канена ыле. А тений вес пашаш куснымо дене отпускем кеҥежлан огеш лий, пашам ыштена, ялышкат миен толаш жапым муына. Адакшым мӱндыр корныш лекташ ӱдырнат эше изи.
Наталья Богданова, Оршанке районысо Кугунур культур пӧрт пеленысе «Какшан сем» ансамбль вуйлатыше:
— Марий кундемна пеш мотор, канаш йӧн уло. А шем теҥыз воктеке кажныже миен толнеже, шонем. Теҥыз юж йоча-влаклан пеш келша, но шукыж годым шийвундо йодыш шонаш тарата.
А.БАЙКОВА
