Шушаш ий гыч ялысе пенсионер-влакын пенсийыштым кӱзыктымӧ нерген мутланат. Чыным ойлат мо?
Н.Емельянов.
Морко район.
Йодышлан Россий Пенсий фондын Марий Элысе пӧлкажын пресс-службыштыжо тыге вашештышт:
– Туге, чыным ойлат. Пенсий нерген у закон ялысе-влаклан посна льготым пуа: ялозанлыкыште 30 ий деч шагал огыл тыршыше, пашам ыштыдыме ялысе пенсионер-шамычлан страховой пенсийыштын пеҥгыдемдыме выплатышт 2019 ий 1 январь гыч 25 процентлан кугемеш. Шоҥгылык да инвалидность шотышто страховой пенсийыш пеҥгыдемдыме выплатын кугытшым тӱлымӧ дела негызеш йодмаш деч посна шотлен луктыт. Делаште «ялысе стажым» пеҥгыдемдыше документ уке гын, пенсионер тудым 2019 ий мучко конден пуэн кертеш. Тыгодымат пенсийым 2019 ий 1 январь гыч угыч шотлен луктыт.
Гражданин пенсийжым «ялысе стаж» почеш угыч шотлен лукмо нерген йодмаш дене 2020 ий 1 январь гыч толеш гын, тидым документым пуымо деч варасе тылзын 1-ше числаж гыч ыштат.
«Ялысе» ешартышым кум принцип почеш ыштат:
- Пенсионерын ялозанлыкыште пашам ыштыме стажше 30 ий деч шагал огыл;
- Пенсионер ялыште ила;
- Пенсионерын пашаже уке (пашам ок ыште).
Ончылгоч шотлен лукмо почеш, Марий Эл Республикысе яллаште 8,5 тӱжем пенсионер ила, чылаштын гаяк 25 процент ешартышым налаш правашт уло.
М.ИВАНОВА.
