Марий Эл Республикын Ялозанлык да продовольствий министерствыштыже регионысо шӧр рынкыште ак вашталтме йодышым лончыленыт.
Совещанийыште РФ Федеральный погынымашын Кугыжаныш Думыжын депутатше С.Казанков, Ялозанлык да продовольствий, Промышленность, экономически вияҥмаш да торговльо министерстве-влакын, «Агробизнес кадрым угыч ямдылыме марий институт» тӧнежын да шӧрым перерабатыватлыше предприятий-шамычын пашаеҥышт лийыныт.
2017 ийым иктешлыме почеш, Марий Элыште чылаже 76 тӱжем тонн шӧрым перерабатыватлыме. Тышечын 36,5 тӱжем тоннжым республикысе ялозанлык предприятийла гыч налме, 0,7 тӱжем тонным – шке озанлыкла гыч, 38,7 тӱжем тонным Киров область, Татарстан да Чуваш республикла гыч кондымо. Шӧрым перерабатыватлыше предприятий-влак 24,6 тӱжем тонн шӧрым, 0,96 тӱжем тонн шӱшмӱйым, 2,43 тӱжем тонн сырым ыштен луктыныт, ӱйдымӧ кукшо шӧрымат 43,7 процентлан шукырак ямдыленыт.
Совещанийын посна темыже – шӧрым налме ак. Кодшо ий тыгаяк жап дене таҥастарымаште тений тудо 17 процентлан шулдештын. Тидын дене келшышын, 3,4 процент нугыдылыкан 1 сорт 1 л шӧр 20,03 теҥге лийын. Шӧрым налме акын палынак волымыжо Юл кундем федеральный округ мучко палдырна. Тидланже йот элла гыч кондымо кукшо шӧр, рынкыш лукмо чот шулдакан шояк продукций, калыкын шӧр кочкышым шагалрак налаш тӱҥалмыже амалым ыштат.
Ялозанлык да продовольствий министр А.Гречихо переработчик-влакын тӱткышыштым сырьём налме акым амалдымын волтымым чарнымылан, утларак шӧрым Марий Эл кумдыкышто налаш тыршымылан ойырен. Тылеч посна Марий Элыште кӱкшӧ качестван шӧр продукцийым ужалыме сетьлашке колтедыме, фирменный торговльым вияҥдыме пашам умбакыже шуяш мутланыме. Тыгак социальный сфер организацийлашке верысе предприятийлаште ыштен лукмо шӧр продукцийым ситараш палемдыме.
Совещанийым перерабатыватлыше предприятий вуйлатыше-влаклан шӧрым ямдылыше-влак дене ойпидышым кужу жаплан ышташ да шӧр продукций рынкым пеҥгыдемдаш темлен иктешлыме.
М.ИВАНОВА.
