Яйцов Крымыште лийын
КУЛЬТУР ДА ИСКУССТВО УВЕР ЙОГЫН

Яйцов Крымыште лийын

Курыкмарий кундемын талантан эргыже, уста гармоньчо Арсений Яйцов шукерте огыл Крымыш миен коштын, поро кумылым ончыктымо концертым ончыктен.

— Кок школ коллектив дене вашлийынам. Концертым Россий гимн дене почмо. Мый гармоньым шоктенам, а туныктышо ден тунемше-влак муреныт. Тиддеч вара Марий Элын гимнже денат палдарышым, — ойла Арсений. — Шагат утла шуйнышо концертыште руш, марий, тӱнямбал калык-влакын музыкыштым шоктенам.

Тиддеч посна А.Яйцов икшыве-влакым олыкмарла да курыкмарла кушташ туныктен.

— Татар йоча-влакын марла кушташ тунемаш кумылым ончыктымышт мыйым моткоч куандарен. Варажым татар семым почешат, тыгак лезгинкымат, лампадымат куштеныт, — ойла гармоньчо.

Арсений Яйцов тусо туныктышо да икшыве-шамычлан пӧлек шотеш Россий артист-влак дене войзалтме фотографий, календарь, марий газет-влакым кучыктен.

— Йошкар-Ола — Российыште эн мотор ола. Олана, республикыштына  пашам йӧратыше, музыкым пагалыше калык илыме нерген каласкалымым тӱткын колыштыныт, — палемдыш Яйцов. — Тушто игече шокшо. Пеледалтше саскан пушеҥге-влакат мотор койыныт.

Самолет дене чоҥештен толмыж годымат А.Яйцов стюардессе-влаклан марий газетым, календарьым пӧлеклен.

А.Байкова.

 

Опубликовать в Одноклассники