Руль воктеке шинчынам веле…
Автомашинам шукерте огыл виктараш тӱҥалше водитель мом палышаш?
А.Морозова.
Кужэҥер район.
Йодышлан Медведево районысо прокурорын полышыкалышыже С.Г.Захарова вашештен:
– Эн ончыч машина яндаш вераҥдышашлык пале нерген палыман. Кок ий деч шагал стажан водительын машинажын шеҥгел яндаштыже «Начинающий водитель» пале лийшаш. Тудо огеш лий гын, озажым административно мут кучаш шогалтен кертыт. Штраф кугыт – 500 теҥге.
Закон почеш кок ий деч шагал стажан водитель моло вес транспортым буксироватлен, тыгак мототранспорт дене пассажир-влакым шупшыктен огеш керт.
Тидын деч посна законодательстве кӱкштышто тыгай водитель-влак шотышто каҥашымашке эре гаяк тыгай темлымашым луктыт:
- 70-90 км/шагат скорость деч писынрак кудалышташ огыл;
- Пычкемыш годым кудалышташ огыл;
- Кугу габаритан але нелытан грузым шупшыкташ огыл;
- Нимогай автомашинам буксироватлаш огыл.
Тыгак 2 ий деч шагал стажан водитель-шамычлан лӱмын жаплан пуымо удостоверенийым ышташ темлат. Но чыла тиде эше закон дене пеҥгыдемдалтын огыл.
Кочывӱд нелемда
Йӱшывуя ыштыме преступленийлан наказанийымат нелыракым палемден кертыт маныт. Чын мо?
Н.Ефимов
Йошкар-Ола
Йодышлан Медведево районысо прокурорын полышкалышыже О.Г.Лесовщикова вашештен:
– РФ Уголовный кодекс дене келшышын, аракам йӱын, наркотикан средстве але аҥыртарыше вещества дене пайдаланен руштмеке преступленийым ыштыше еҥлан наказанийымат нелыракым палемдат.
Йӱшӧ лиймыжым преступленийым нелемдыше обстоятельство семын ончыкташлан суд чылажат шотыш налеш: преступленийын обществылан могай лӱдыкшым конден кертымыжым, тудым ыштыме обстоятельствым, йӱшӧ лиймашын преступленийым ыштышын койшыжлан влиянийжым да титакан еҥын могай личность улмыжымат.
Чыла тидым шотыш налын, суд титаканын йӱшӧ лиймыжым преступленийым нелемдыше обстоятельство семын палемда гын, приговорыштат тыгай пунчалым лукмо мотив ончыкталтшаш. Вет преступленийым нелемдыше обстоятельство наказанийымат нелемда. Тиде амалллан кӧра изи нелытан преступленийым икымше гана ыштышымат эрык деч посна коден кертыт.
Сӧрасаш лиеш, но…
Преступленийым ыштыше ден эҥгекыш логалше сӧрасен мутланен келшат гын, уголовный делам кеч-кунамат петырат мо?
М.Колесов.
Советский район.
Йодышлан Медведево районысо прокурорын полышкалышыже О.Г.Лесовщикова вашештен:
– Россий законодательстве дене келшышын, прокурорын согласийже почеш следственный орган вуйлатыше але дознаватель, изирак але кокла нелытан преступленийым ыштымаште титаклыме але титаканлан шотлымо лица шотышто уголовный делам петыренат кертеш. Но тыге лийже манын, титакан еҥ эҥгекыш логалшылан ыштыме эҥгекым шӧрышаш да сӧрасен мутланен келшышаш. Ыштыме эҥгекым шӧрымаште эҥгекыш логалшын закон ден келшыше интересшым да праважым пудыртымо преступленийым ыштыме дене кондымо роскотым петырымашым умылыман. Титакан еҥ тидым шкеже ыштен огеш керт гын (мутлан, тудым шынденыт але ийготыш шудымылан кӧра пашадарже уке), тыште лишыл еҥже-шамычат полшен кертыт.
Но Уголовный кодекс дене келшышын, титакан ден эҥгекыш логалше сӧрасен мутланен келшат гынат, суд чыла обстоятельствым, титакан еҥын личностьшын могай улмыжым шотыш налын, уголовный делам петыраш торешат лийын кертеш.
С.Носова ямдылен.
