Кок ияш йочам ончен куштем. Пашам пуышо мыйын келышымем деч посна кандаш шагат деч утла але йӱдым пашам ыштыктен кертеш мо?
М.Маркова.
Йошкар-Ола.
Йодышлан Медведево районысо прокурорын полышкалышыже С.Г.Захарова вашештен:
— РФ Паша Кодексын 259-ше статьяж дене келшышын, кум ияш марте йочам ончен куштышо ӱдырамаш-влакым кандаш шагат деч утла але йӱдым, тыгак каныш але пайрем кечылаште нунын келшымышт деч посна пашам ыштыктен огеш керт. Тыгак командировкышкат колтен огеш сеҥе.
Ӱдырамаш келша гын, тидыжым кагазыш возен пеҥгыдемдышаш. Но тыштат условий уло: федеральный закон да моло правовой норматив дене келшышын ыштыме медицине заключений тидлан тореш лийшаш огыл.
Тидын годым кум ияш марте йочам ончен куштышо ӱдырамаш кандаш шагат деч утла але йӱдым, тыгак каныш але пайрем кечылаште пашам ышташ келшыме деч отказен кертмым пенгыдемдыше документ дене палыме улмыжым кагазыш возен пуышаш. Тыгай права дене марий але вате деч посна кодшо, 5 ияш марте йочам ончен-куштышо ава ден ачат пайдаланен кертыт. Ты гарантий инвалид йочам ончымо, ешын членже-влакын черле улмышт годымат (медицине заключенийышт уло гын) пуалтеш.
С.Носова.
