Очыни, интернетын кумдан шарлымыж дене, пытартыш жапыште еҥ-шамыч шке кидышт дене тӱрлымат ышташ тӱҥалыныт.
Мутлан, телым яллаште поснак чолга да шке илыме верыштым сылнештараш кумылан-влак лум гыч фигур-влакым ышташ кумылаҥыныт. У Торъял районысо тӱвыра да каныме рӱдер пашаеҥ-влак кодшо ий мучаште эсогыл тыгай конкурсым увертареныт ыле. Да мо оҥайже, тушто кок сеҥышыже Параньга район Яҥгетсола гыч лийыныт! Икымше вер дене ты ялысе клубышто тыршыше-влакын лум чумыркашт-влакым палемденыт гын, кумшо верыш ты ял гычак Смышляевмыт ешын «Кабриолет машинаштым» да «вате-марийыштым» шотленыт! (Такше авторжо 7-ше классыште тунемше Феликс эргышт манын палемдалтеш. Пашаже «Уна-влакым вашлиймаш» маналтеш — авт.) А клуб ден Смышляевмытын сурт-оралтышт ик уремыште веле мо, эсогыл ваштарешак улыт! Кӱлын вет тыге лияш!
Смышляевмыт дене палыме лияш мийыме годым Феликс капка ончылнышт лачак лумым куа ыле. Ончыч тудын дене мутланышна, эсогыл «машинам виктараш» шындышна! (снимкыште) А вара мый шкеат шинчын да рульым пӱтыркален ончышым. Да-а, лум машина дене «кудалышташ» эше логалын огыл ыле…
А вара рвезе мемнам мӧҥгышкыжӧ пуртыш. Тушто аваже Роза Виссарионовна ден Венера акаже улыт ыле. Венера ты ялышкак марлан лектын. Но клубышто арулыкым эскерышылан ышта да, а тудыжо лач шочмо суртшо ваштареш верланенат, ача-аваже, шольыж-шамыч деке чӱчкыдын пурен лектеда. Мийымына годымат туштак ыле да мом кузе ыштыме нерген тудат каласкалымашке ушныш.
– Шуко моло семын икшыве-шамычын изиракышт годым Снеговикым ыштена ыле. Вара Йӱштӧ Кугыза ден Лумӱдырым келыштараш тӱҥалынна. Тыгак лум гыч кожымат чумырен шогалтымым шарнем. Ончычшо кеч-можымат шке шонен муын ыштыме. А кызыт интернетыште, тыгак тӱрлӧ вере миен коштмо годым иктаж-мом ойыртемалтшым ужат да шкендынат ыштен ончымет шуеш, – палдарыш озавате.
– А тенийже молан лачшымак машинам «конден шогалтенда»? – йодым.
– Тиде гана ала-мом оҥайым, молын гайым огыл ыштыме шуын. Лум гыч машинам ыштымым эше ужалтын огыл ыле, санденак тыгай шонымашна шочын, – рашемдыш Венера. – Пӧртна ял покшелнырак верланен да унала толшо-шамыч монь мемнан турашке шуыт, ончен шогат, южышт эсогыл фотографийым ыштат, шкештат пырля сниматлалтыт ыле. Ончыч клуб ончылно
улшо фигурко-шамычым тӱслат, тушто снимкым ыштат, а вара мемнан деке савырнат ыле.
– А те конкурс эртаралтме нерген пален налында да тушко ушнаш кумылда лектын але тӱҥалтыште шканда веле чумыртылында, а вара тушко фотографий-влакым колтенда? – палыме шуо.
– Йӧршынат конкурслан кӧра ыштен огынал! А, ыштымекына, Эльвира кокам (верысе клуб вуйлатыше Эльвира Виссарионовна Захарова, аважын акаже – авт.), фотографироватла да конкурсыш колта манын каласен огыл да паленат огынал. Шкеннан, эртен кайыше-шамычын кумылыштым нӧлтымӧ шуын да келыштаренна.
А кузе ме «машинажым» ыштенна?! Тиде кызыт лум шуко возын. А У ий вашеш моткочак шагал ыльыс! Калай волыш оптенна, лейке дене вӱдым шавен нӧртенна, лумым пудыратенна, вара веле кӱлеш формым чумыртыл кертынна. Лум уке, улшыжо лавыран ыле. Яндарракшым кольмо дене поген-поген ыштыме!
«Машинам» ыштымашке чылан вет ушненна! Ачамат лектын ыле. Тудо фарым, рульым келыштарен. Мый «Кабриолетым» чиялтенам. Тыглай гуашь дене. Тудым вӱдыштӧ лугенам да «машинашке» оптенам. Кок майонез ведра чиям кучылтынам! Лум вате ден марийын ӱпыштым чиялташат тудын денак пайдаланенам. Кызыт чыла тидым шарналтена да оҥайын веле чучеш, – шыргыж каласкалыш Венера.
Теле шукерте огыл гына эртен кайыш веле гынат, тиде ешын кызытак вес ийын эше мом ышташ лийме шотышто шонымашыже ятыр.
– Тений кумшо верыш лекме гын, ынде шушаш ийын икымше але кокымшо верым сеҥен налаш кӱлеш ыле, – мане Венера.
– Юмо лумым пуа гын, – ешарыш аваже, Роза Виссарионовна.
Тугеже тек тыгак лиеш. Тек У ий вашеш лумат шукак возеш!
Любовь КАМАЛЕТДИНОВА
