Тений Российысе археологий экспедицийлан 100 ий темеш гын, Йылмым, литературым да историйым научно шымлыше В.М.Васильев лӱмеш марий институтын Археологий пӧлкажлан — 50 ий.
Археологын кечыже лӱмеш институтышто «Йыргешке ӱстел» эртен. Тушто марий археолог-влакын тенийсе паша лектышыштым иктешленыт. Вашлиймашке республикын тӱвыра, печать да калык-влакын пашашт шотышто министр Константин Иванов миен. Каласен кодыман: археолог-влакын тенийсе паша лектышышт куандарыше лийын. Нуно Юрино ден Звенигово районлаште пургедме пашам эртареныт да кугезе марий-влакын кокла курмыласе илышышт нерген палдарыше шуко оҥай арверым муыныт. Санденак пургедме вер-влакым – «Выжумский ден Красногорский шӱгарла-влакым» (лач тыге нуным лӱмденыт) — федеральный значениян тӱвыра поянлык объект реестрыш пуртеныт.
С.НОСОВА.