Кодшо кечылаште У Торъял поселкышто, районысо тӱвыра да каныме рӱдерыште, «Идалыкын ешыже» конкурс эртен.
Тушко таза илыш йӱлам кучышо, мер пашашке чолган ушнышо, спортлан шӱман – икманаш весе-влаклан пример лийын кертше еш-влак ушненыт.
Кажныже шке еш историйжым оҥайын да ойыртемалтшын каласкален. Сандене тиде конкурсышто ала-кудо ик ешым икымше верыш лекше семын саламлен огытыл а чылаштымат могай-гынат номинацийыште палемденыт. Мутлан, «Шуко шочшан еш» номинацийыште Кугу Нурмо гыч Блиновмыт ден Тошто Торъял гыч Прозоровмыт, «Самырык еш» номинацийыште Тушнур гыч Новоселовмыт (снимкыште) (мут толмашеш, тиде еш тений 23 мартыште Тюменьыште эртыше IX весроссийский ялысе теле модмаште чыла еш команде коклаште кумшо верыш лектын! – авт.) ден У Торъял поселко гыч Садовинмыт, «Ялысе еш» номинацийыште Овалже гыч Маличенкомыт ден Чашка гыч Кузьминыхмыт, «Шӧртньӧ еш» номинацийыште У Торъял поселко гыч Дмитриевмыт, «Йӱлам аралыше еш» номинацийыште Кыдал Орью гыч Порошинмыт ден Элембай гыч Домрачевмыт еш-влак ойыртемалтыныт.
Тиде арнян тыгаяк конкурс республик кӱкшытыштӧ эртаралтеш. Тушто У Торъял районын чапшым Блиновмыт ден Маличенкомыт еш-влак аралаш тӱҥалыт.
Л.Камалетдинова.
Фотом районысо тӱвыра да каныме рӱдерын архивше гыч налме.
