15-16 сентябрьыште Москваште Россий ӱдырамаш-влак ушемын молодежный форумжо эртен. Марий Эл гыч тушко Ольга Васильева миен.
Тудо Шернур поселкысо 2-шо №-ан школышто ритмикым да хореографийым туныкта, тыгак школыштышт «Грация» ансамбльым вуйлата.
Ольга Вячеславовна мер илышышкат чолган ушна. 2019 ий гыч тудо – районысо молодежный парламентын председательже. Тыгак Шернур районышто «Единый Российын» Молодой гвардийжын» пашажым курироватла. А кызыт эше #МыВместе общероссийский акцийын Шернур районысо волонтер-влакын штабышкышт ушнен.
А тений январь гыч — «Россий ӱдырамаш-влак ушем» общероссийский мер-кугыжаныш организацийын членже. Тудо культурно-массовый да волонтер паша дене кылдалтше йодыш-влаклан вуйын шога. Санденак Ольга Васильева Россий ӱдырамаш-влакын эртарыме «Эн сай молодежный проект-влак» I-ше конкурсышкыжат волонтер паша денак кылдалтше «Помнить всем Отечеством» проектым колтен да поснак ойыртемалтше семын палемдалтын.
Тушко СЖР-ын регионысо отделенийлаж гыч 35 паша да Российысе субъектла гыч 33 проект пуреныт. Тышеч нылытше сеҥыше радамыш логалыныт, а эше визытым, нунын коклаштак Ольга Васильеванымат, жюри палемден. Нине 9 проект ынде Россий ӱдырамаш-влак ушемын полшымыж дене илышыш пурталташ тӱҥалыт, палдарыме ушемын официальный сайтыштыже.
Л.КАМАЛЕТДИНОВА
Снимкыште: Ольга Васильева Российысе ӱдырамаш-влакын мер-политике толкыныштын председательже, РФ Кугыжаныш Думын депутатше Екатерина Лахова дене пырля.
