УВЕР ЙОГЫН

Ынде вес кундемыш коштшаш уке

Медведево поселкышто верланыше 3-шо номеран исправительный колонийын кумдыкыштыжо икымше исправительный рӱдер семын пашам ыштыше изолироватлыме участке ышталтын. Кодшо арнян тушто журналист-влаклан Почылтшо омса кечым эртареныт.

Рӱдер судитлыме 52 еҥлан виеш (принудительно) пашам ыштыкташ келыштаралтын. Кум пачашан зданийыште иканаште 40 пӧръеҥ ден 12 ӱдырамаш илен кертыт.

Принудительный манме пашам суд 2 тылзе гыч 5 ий марте ыштыкташ палемден кертеш. Тыгай наказаний изирак, тыгак кокла нелытан але неле преступленийым икымше гана ыштымылан эрык деч посна кодымо олмеш пуалтеш. Исправительный пашам шукташ палемдыме годым осужденный прописке верыштыже илышаш гын, принудительный пашам ышташ палемдыме годым — исправительный рӱдерыште.

Эше ӱмаште тудо пашам ыштен огыл, а тыгай наказанийже 99 еҥлан, утларакше пӧръеҥ-влаклан, палемдалтын. Сандене нуно Кирово-Чепецкыште да Казаньыште улшо рӱдерлашке шке семынышт коштыныт. Но чыланак огыл палемдыме верыш миен шуыныт. Южышт шылыныт да эсогыл кычалаш логалын. Тыге икте, мутлан, Новороссийск марте шуын. Кызыт тиде категорий судитлыме еҥ-влак наказанийым шке кундемыштыштак шуктен кертыт, палдара ФСИН-ын Марий Элысе управленийжын пресс-службыжо.

Л.Камалетдинова.

Опубликовать в Одноклассники

Добавить комментарий