4 октябрьыште Москваште, ВДНХ кундемыште, «Шӧртньӧ шыже-2017» Всероссийский ялозанлык выставке почылтын. Тушто ялозанлыкын экспортный вий-куатшым да агропромышленный комплексыште инвестиций пашам вияҥдыме шотышто йодыш ончыл верыш лектын.
Ялозанлыкын ий еда эртарыме тӱҥ форумышкыжо Российысе да йотэлласе кок тӱжем утла предприятий, организаций-шамыч, сатум лукшо-влакын ушемышт ден ассоциацийышт чумыргеныт. Марий Эл Республик гыч ялозанлыкысе ден перерабатыватлыше отрасльысе 25 ончыл предприятий миен.
Делегацийым Марий Элым вуйлатыше Александр Евстифеев вуйлата. Тудо выставке нерген икымше шонымашыж дене палдарен.
— Эр гычак тӱҥалын выставкыш лукмо чыла экспозиций дене палыме лийына. Нуным моткоч устан сӧрастареныт. Дизайн могырым ом ман, а кочкыш продуктым ончыкташ лукмо шотышто. Российысе кочкыш сатум ямдылыше-влаклан уло мом ончыкташ. Тиде – экологически яндар продукт, сай рецептуро, кумда ассортимент, консервант ден кочкышыш ешартыш дене пайдаланыдымаш. Тиде пеш кугу сеҥымаш, да чынжымак элна ваштареш ыштыме санкций мыланна пайдам гына пуа, — палемден Марий Элым вуйлатыше.
Марий Эл гыч выставкыш кугу предприятий-влак деч посна тыгыде шке озанлык-влак, мутлан, мӱкш ончышо-шамыч, шке кочкыш сатуштым намиеныт. Кугу холдинг-влакын продукцийыштым ончыкташак гына луктыныт да нуным тамлен ончаш веле лиеш гын, шке озанлык-влак деч тудым налаш лиеш. Выставкын участникше-влак поро йӱла почеш конкурслашке ушненыт. Мутлан, Медведево район Руэм ял илем «Ял илем-влакым чарныде вияҥдымаш» конкурсыш йодмашым возен. «Лукоз» ООО сай урлык вольыкым ончыктымо конкурсышто участвоватлаш кумылым ончыктен. Тудо «Вольык озанлык» ужашыште республикыште лукмо сай урлык казам аклаш луктын.
А.Евстифеевын мутшо почеш, кызыт кажне сатум лукшо пошкудо регионлаште мо ышталтмым сайынак пален налнеже.
— Молан манаш гын шукыштын кучылталтде кодшо, кочкыш рынкыште палыдыме да выставкыш лукдымо сырьешт уло. Тыште лач ты опыт дене палыме лийыт, специалист-влак, вашла мутланен, икте-весе деч шуко уым пален налыт. Выставке пешак пайдале, моткочак оҥай да кӱлешан. Тудым эртарыме жапшымат келшышым ойырен налме, молан манаш гын тиде – шурным поген пытарыме пагыт, тыште мом ончен куштымым, могай качестван улмым, темлыме кочкышын кугытшым ужына. Тидыже шушаш ялозанлык идалыкым эшеат вияным ужаш тарата. Икманаш, пашам ыштена, — манын А.Евстифеев.
Чумыр элысе аграрий-влак выставкыш эн сай инвестиций проектыштым, кочкыш ден перерабатыватлыше промышленностьын эн чапле продукцийыштым, ялозанлык техникым да оборудованийым луктыныт, Тылеч посна «Шӧртньӧ шыже-2017» выставкыште эн сай урлык ялозанлык вольыкым ончыктат.
А.АНДРЕЕВ.
