1 мартыште Йошкар-Олаште «Шарнымаш линейке» торжественный мероприятий эртен. Тудо Чечня сарысе 104-ше парашютно-десантный полкын 6-шо ротыжын подвигшылан пӧлеклалтын. Российын Геройжо гвардий подполковник Марк Евтюхинын бюстшо воктене ӱмыр лугыч лийше десантник-влакым шарналтеныт.
Почётан уна семын Марий Элын тӱҥ федеральный инспекторжо П.Журавлёв, «Йошкар-Ола» ола округын вуйлатышыже А.Принцев, Марий Элысе десантник-влак ушем вуйлатыше М.Фаткуллин, юнармеец, военно-патриотический клуб, ветеран организацийла гыч еҥ-влак лийыныт. П.Журавлёв Россий Президентын Юл кундем федеральный округысо полномочный представительже Игорь Комаровын саламлымыжым лудын.
Мероприятий ик минут шып шоген шарныме дене мучашлалтын.
Ушештарена: гвардий подполковник, батальон командир Марк Николаевич Евтюхин 1964 ий 1 майыште Йошкар-Олаште военный строитель ешыште шочын. Салтак илышыже Псковысо дивизийыште (ВДВ) эртен. 13 ий жапыште Марк Евтюхин шуко «шокшо» точкышто лийын. Командировкыжо Киргизийыште, Азербайджаныште, Арменийыште да Афганистаныште эртен. Югославийыштат лияшыже логалын.
Черетан командировко 2000 ий 29 февральыште лийын. 2500 боевик улыжат 90 еҥан десант рото ваштареш тарванен. 104-ше парашютно-десантный полкын 6-шо ротыжо 776 метр кӱкшытыштє лийын. 1 март эрдене кокымшо Чечня сарыште ойган вашпижмаш ылыжын. Неле бой 15 шагат шуйнен. Кӱшнӧ, курыкышто, оружийым кидыш кучаш йӧршӧ ныл гвардеец гына кодын. Эн лӱдыкшє жапыште подполковник Евтюхин ден капитан Романов артиллерийын тулжым «ӱмбакышт» колташ йодыныт. Икмыняр жап гыч лӱддымє да патыр комбатын илышыже кӱрылтын. Тыге десантник-влак Хаттаб ден Басаевын планыштым кӱрлыныт. Ты бойышто 6-шо ротын 84 военнослужащийже вуйжым пыштен. Нунын коклаште – 13 офицер.
Комбатын патырлыкшым да героизмжым шотыш налын, террорист-влак ваштареш кучедалмаште геройлыкым ончыктымыжлан Йошкар-Ола гыч десантник М.Евтюхиным Российын Геройжо лӱм дене палемденыт.
Е.Эшкинина.
