САМЫРЫК ТУКЫМ

Шуматов.ru

Ӱмаште Морко район Унчо селаште эртаралтше Самырык тукым слётышто лийме годым, тиде эргым видео камер деч посна ужашыжат огеш лий ыле. То футболым сниматла, то кажныж деке тӱрлӧ йодыш дене лишемеш… Мутем Пермь кундемыште илыше марий рвезе Дмитрий Шуматов нерген.  

— Видеокамер да тый пуйто ик тичмаш улыда…

Шарнем, изиэм годым, шовыным оптымо тошто атым налын, камер манын, пелен сакен коштынам. Тидын годым пуйто ала-могай кугу передачын вӱдышыжӧ лийынам. Фильм-влакым, YouTube сайтыште тӱрлӧ видеом йӧратенак ончем ыле. Тидыжак иктаж-мом шке сниматлен ончаш кумылаҥден. Садланак кочам деч камерым йодынам.

Икымше видео мо нерген лийын?

Омат шарне. А икымше сайын лекше пашам  кӱчык жапыште кумдан палыме «Тает лёд» клиплан пародий. Тудым тӱжем утла еҥ ончен. Кызыт тудо видеом YouTube-ышто «Шуматов»  каналыште ужаш лиеш. Тиддеч вара мурым да видеом профессионально ышташ шонен пыштенам.
      — Ончышо-влак кузе тудым вашлийыныт? Мом ойленыт?

Эн ончыч шке пашам ВКонтакте социал сетьыште йолташем-влаклан колтенам. Тыге кечыште икымше 50 подписчикем погынен. Шукынжо «сай паша», «молодец» маныныт, поро шомак дене мылам полшеныт. Икмыняр хейтерат (кӧраныше еҥ) лектын. Пырля тунемше ӱдыр-эрге-влак, мыскарам ыштен, иквереш фотом ышташат йодыныт.
        — Блогер пеш  шуко оксам ышта маныт…

Мый тӱҥалтыште окса але чапым нӧлтымӧ нерген нимынярат шонен омыл. Ала-мом уым ыштен ончымо шуын. Тыге, сценарийым возен, моторын сниматлен, монтироватлен да тулым кӱлеш могырыш виктарен, видеом ыштен онченам. Тиде паша дене мый оксам кызыт ыштен ом нал. Шке шонымашым лудшо, ончышо деке чын намиен шуктымо, мыйын шонымаште, шергырак. Тыгак тиде оҥай еҥ-влак дене вашлияш, шкем келшыше аланыште вияҥдаш йӧным пуа.

— Яра жапетат уке, очыни…

    — Тӱрлӧ могырым шкем терген ончынем. Садлан муро, дизайн маркетинг йыжыҥлаштат вияҥаш тыршем. Курык гыч ече дене мунчалташ йӧратем.

Кеҥежым шольым, кочам дене пырля вуйдеҥге чайым ыштена. Родо-влаклан тудым пайремлаште пӧлек семын чӱчкыдын кучыктена. Чыланат пеш тамле маныт да вес ганат кондаш йодыт.

О.МОШКИНА

Опубликовать в Одноклассники

Добавить комментарий