Республикым вуйлатыше Александр Евстифеев «Россельхозбанкын» (РСХБ) Марий региональный филиалжын директоржо Георгий Сергеев дене вашлийын мутланен.
Тидын годым нуно ялозанлыкым вияҥдыме, тыгак кундемым социально-экономически вияҥдымашке виктаралтше инвестиционный проект-влакым шуктен толмо сферыште РСХБ ден республикын правительствыже коклаште пырля пашам ыштыме кылым кумдаҥдыме йодышлам каҥашеныт. Александр Евстифеев ден Георгий Сергеев кундемысе агропромым кредитоватлыме шумлык кызытсе ситуацийым лончылен лектыныт, ялозанлык сатум ыштен лукшо-влаклан иземдыме процентный ставке негызеш финанс полышым пуымо икмыняр йодышым каҥашеныт.
«Россельхозбанк республикын агропромышленный комплексшым финансироватлымылан поснак кугу тӱткышым ойыра. Ты шотышто кодшо ийысе да тений кок тылзе жапыште шуктымо пашаште шумо показатель-влакым те кузе акледа? Мемнан производитель-влак лач Россельхозбанк дене пырля пашам ыштымаште мом вучен шуктат? Россельхозбанк – профильный банк, сандене ме пеҥгыдемше кылнам кӱкшын аклена»,- каласен Александр Евстифеев.
Георгий Сергеевын ойлымыж почеш, 2018 ийыште Россельхозбанк республикысе аграрий-влаклан 6 миллард утла теҥгеаш кредитым пуэн, тидын шотыштак изи ден кокла кугытан бизнеслан 640 миллион теҥгем ойырымо, озанлык пашан изи формыжо-влаклан – 36 миллион теҥгем. Тений кок тылзыште банк 660 миллион теҥгеаш кредитым ойырен, изи ден кокла кугытан бизнеслан кредитым пуымо кугыт 160 миллион теҥге марте кушкын.
«Прогноз почеш, 2019 ийыште аграрий-влакым финансироватлымаш кугемшаш да 7,5 миллиард теҥгеш шушаш, изи ден кокла кугытан бизнеслан ойырымо кредитын чумыр кугытшым кум пачаш ешараш да 90-100 миллион теҥгеш шукташ палемдалтеш»,- увертарен Георгий Сергеев.
Вашлиймаште тыге палемдыме: банк кредит шотышто ставкым мучаш марте иземден. Тылеч посна АПК предприятий-влак льготан кредитым налыт. Ставкын кугытшо – талукышто 5 процент. Республикыште ялозанлык сатум ыштен лукшо-влаклан полышым пуымо формо-влак кокла гыч иктыже семын ты йодышлан Марий Элым вуйлатыше поснак кугу тӱткышым ойырен. Александр Евстифеев льготан кредит шотышто пунчалым лукмо жап да кредитым оформитлыме нерген радамлын йодыштын.
«Шошо толын шуын, манмыла, шошо кече талукым пукша. Ялозанлык сатум ыштен лукшына-влакым урлыкашым, техникым да, эн кӱлешанже — дизель топливым налме йодыш тургыжландара» палемден Марий Элым вуйлатыше. Тудо республикысе аграрий-влаклан льготан кредитым пуымо йодыш кужун ынже шуйно манын, республикын кучемже банкым вуйлатыше-влаклан кузе полшен кертеш манын йодыштын.
Вашлиймаште рашемын: «Россельхозбанкын» Марий региональный филиалжылан лимитым палемдыме: тудо 5 миллион теҥге кредитым шкевуя пуэн кертеш. 25 мартлан уполномочитлыме банк льготан кӱчык жаплык да инвестиционный кредитым налын кертшаш ныл заемщикым сайлан шотлен. Тиде – «Москва» ялозанлык предприятий», «Оршанке сельхозпром» ООО, «Рассвет» агрофирме ООО да индивидуальный предприниматель Юрий Алексеевич Малов.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
Д. Речкинын фотожо
