Республикысе районлаште шошо ага тургым вийым налын.
Тенийысе шошо ага вараш кодын тӱҥалмылан кӧра мланде пашаеҥ-влак, жапым поктен шуаш манын, ятырлан писештыныт. Тидлан ояр игечат йӧным ышта. Тыге май кыдаллан республикысе озанлык-влак палемдыме чумыр кумдык гыч (тиде гана 139,4 тӱжем гектарыш, але кодшо ийысе деч ныл тӱжем гектарлан шукырак ӱдыман) 35 процентыште икияшым вераҥдыме. Кодшо ийын тыгяк жаплан 41 процентым ӱдымӧ ыле. У Торъял, Звенигово район-влак ончылно улыт, 63-60 процентыште ӱденыт. Тиде кечылаште суткаште куд-шым тӱжем гектар дене ӱдат. Кодшо ийын вич тӱжем гектарыш веле вераҥденыт ыле. Марий Турек районышто, мутлан, кече еда 1,2-1,3 тӱжем гектарыш ӱдат. Тений тиде районышто икияшым чылаже 26,8 тӱжем гектарыш, але республикыште эн шуко, вераҥдыман.
Пареҥгым але шындаш тӱҥалын огытыл. Тудым тений 2259 гектарыш вераҥдаш палемденыт. Ӱмаште тиде жаплан 747 гектарыш шындыме ыле. Пакчасаскам 1488 гектарыш шындыман, тышечын 1265 гектаржым — Курыкмарий районышто. Тиде да У Торъял районышто 25 гектарыш вераҥдыме. Йытыным тений Советский районышто 300 да Оршанке районышто 100 гектарыш ӱдаш палемденыт. Але ты пашам тӱҥалме огыл.
Кокияш озымлан ешартыш кочкышым 38 тӱжем гектарыште пуымо, шукияш шудылан – 11,2 тӱжем гектарыште.
Тиде снимкым Кужэҥер районысо «Искра» колхозышто ыштыме. Механизатор Г.Морозовын виктарыме агрегатше шыдаҥым вераҥда ыле. Кече еда кумло-нылле гектарыш ӱда.
В.СМОЛЕНЦЕВ
Авторын фотожо
