ЯЛОЗАНЛЫК

Шошо жап – шокшо жап

Мланде почылтмо деч вара республикысе озанлыклаште пасу паша чолган ушна. Чыла сомылым кажныже жапыштыже да кӱлеш семын ыштен шуктынеже.

Теве кодшо кечылаште У Торъял районысо «Первый май» колхозыш мийышна. Ик вере, Масканур селашке кайымаште, пурла вел пасушто пурак веле нӧлтеш ыле – тунар паша «шолын». Тушнур бригадын бригадирже В.Рябининын ойлымыж почеш, тыште, парлан кодымо 220 гектар кумдыкышто, горчицым ӱденыт. Ончыкыжым ик ужашышкыже кукурузым ӱдаш шонат.

Тунам эше кугу йӱр лийын огылат, кушто трактор-шамыч кудалыныт – почешышт тӱргалт кодшо пуракым ужын, мыняр технике да кушто ӱдымышт  вигак рашемын. Но фотографийым ышташ миймына годым кечывал деч вара икте пудырген шогалын ыле. Тидыже умбачынак койын – пурак кӱшкӧ нӧлталтын огыл. Вараже технике йыр механизаторын ачалкалаш тӧчен коштмыжымат ужна. Ты озанлыкыште тракторымат, машинамат, молымат ий гыч ийыш уэмденак толыт гынат, азапат лийын кая, нимом от ыште. Кӱртнят курымаш огыл.

А колхозын Кужнур ял шеҥгелсе пасушкыжо тиде жапыштак Тушнур ферме гыч ончылгоч луктын ямдылыме терысым шупшыктат ыле. Туштыжо паша сайын вораныме палдырныш. Молан манаш гын ора-влакат кугу кумдыкым айленыт ыле, тракторат тольо, ястарыш, кайыш, адакат тольо, ястарыш, кайыш… Колхозын тӱҥ агрономжо А.Курбатовын ойлымыж почеш, тыге – кечыгут. Адакшым ик кече веле огыл, а паша кызытат шуйна. Но ынде – вес пасушто – Тушнур ял мучаште. Тушкыжо теҥгече шупшыкташ тӱҥалыныт.

Анатолий Николаевичын палдарымыж почеш, тиде кечылаште колхоз  пасулаште шӱкшудым пытарышашлан химобработкым ышташ тӱҥалшаш улыт. 

Марий Элысе Ялозанлык да продовольствий министерствын данныйже почеш, 24 майлан, мутлан, республикыште пасу паша тыгерак ушнен: ӱдышаш пырчым Кужэҥер, Шернур, Морко, Волжский да Оршанке районлаште, тӱрыс, 100 процент, аяртеныт. У Торъял районышто ты паша тиде кечылан 1 процент гына кодын улмаш.

Икияш культурым кодшо кугарнялан Юрино районышто 155 процент кумдыкышто, Звенигово районышто — 103 процентыште, Шернурышто 102 процентыште ӱденыт. Но тидыже такше мыняр гектар кумдык улмо денат кылдалтеш. Мутлан, У Торъял районышто 10934 гектар палемдыме план гыч 9989 гектарыштыже ӱден шуктеныт. Тидыже 91 процент лиеш. Тугеже паша ушна. А теве икияш пырчан да пырчан-отызан культурым ты район 100 процентыште ӱден.

24 майлан налмаште, республик мучко чылаже 108811 гектарыште икияшым ӱдымӧ. Ӱмашсе тыгаяк жап дене таҥастараш гын, тунам тиде цифр изирак лийын — 98036 гектар улмаш.

Тӱрыс налмаште, чыла вережат пасу паша сайын ворана. Южо кечынже йӱр чотак йӱрмӧ озанлык-влаклан чаракым ыштен да пашаштым эркыштарен гынат, почеш кодаш иктат огеш шоно. Вет ойлат: «Шошо кече идалык пукша». А эше тыгай калыкмутат уло: «Шошо жап – шокшо жап». Тугеже юватылаш огеш лий.

 

ЛЮБОВЬ КАМАЛЕТДИНОВА

Авторын фотожо

Опубликовать в Одноклассники

Добавить комментарий