23 апрель. Кече кӱшыч шыратен ончен, оралте ӱмбач вӱд чыпчен, йол йымалне лум шулен, эҥерла вӱд йоген. Пӱртӱс помыжалтмым эскерен, эрдене эрак Морко кундем гыч 170 наре самодеятельный артист Марий Республикнан рӱдолашкыже шым автобус дене тарванен. Ты кечын Сеҥымашын XXX идалыкше лӱмеш культур полат ончылнат, кӧргыштат калык шыҥ-шыҥ погынен. Тений Морко районын уста, талантан еҥже-влак концерт программыштым «Шочмо кундемын семже» манын лӱмденыт.
Йошкар-Олаште Морко землячествын еҥже-влак пайремыш толшо кугу уна-влакым, Марий Эл правительстве председательын икымше алмаштышыже, тӱвыра, печать да калык-влакын пашашт шотышто министр Михаил Васютиным, Марий Эл Республикыште тӱҥ федеральный инспектор Александр Ситниковым, Кугыжаныш Погын вуйлатышын алмаштышыже Анатолий Ивановым, Морко район администраций вуйлатыше Сергей Григорьевым, ты районысо депутат-влак погынымашын председательже Светлана Ивановам, кинде шинчал дене вашлийыч.
Михаил Зиновьевич, Морко калыкым пайрем дене саламлымекыже, Марий Эл Республикым вуйлатышын сомылжым жаплан шуктышо Александр Ефстифеевын саламлымашан серышыжым лудын пуыш.
— Морко кундем марий калыкнан акрет годсо тӱвыражым, сымыктышыжым, йӱлажым арален кодымыж дене чаплана. Тиде поянлыкым «Шочмо кундемын семже» усталык проектыш пуртымым моткоч сайлан шотлыман, — возымо серышыште. — Адакшым тиде концерт гыч погынышо шийвундо Морко кундемыште культур объект-влакым олмыкташ колтымымат сай могыр гыч палемдыман.
Концертыш чумыргышо зал тич калыкым В.Лазарев лӱмеш калык академический хор, «Морко кундем», Йоча сымыктыш школ пеленсе «Калинка», «Рвезылык», Изи Кушна гыч «Кушна мланде», Коркатово гыч «Куан памаш» ансамбль-влак, Тат-Кушна гыч «Ялкын» студий, тыгак Осипсола гыч «Весела кумыл», Марий Кужер гыч «Муро аршаш», Шеҥше гыч «Ӱжара», Унчо гыч «Унчо ӱжара» фольклор ансамбль-влак, Морко калык театр, йоча театр, Октябрьский гыч «Ювента», «Импульс» эстраде коллектив-влак тӱрлӧ муро, куштымаш, лыкын-лукын йоҥгалтше сем, тӱрлӧ койыш-шоктыш дене палдарышт, ик татлан шочмо Морко мландыш «намиен кондышт». Тиддеч посна Рафик Гилимовын, Ринат Аюповын, Лилия Шакирован, Надежда Кузнецован, Валерий Петровын, Ольга ден Алёна Иванаевамытын мурымыштымат куанен да тыгодымак кугешнен колыштмо. Вет Морко районышто марий, руш, татар калык-влак келшен илат веле огыл, кундемнан чапшым кӱшкӧ нӧлтат.
Пайрем концертым Морко кундемын гимнже мучашлыш. Тудым сценысе артист-влакат муреныт, залыште шинчыше, Морко районышто шочын-кушшо кажне еҥ кугешнен йоҥгалтарен. Вет шочмо кундемын гимнжым республикнан рӱдолаштыже мураш — кугу пиал.
Морко кундемыште усталык шӱлышан, йӱлам, тӱвырам арален моштышо калык ила, тудым тукым гыч тукымыш шуя. Тидым эртыше концертыште эше ик гана пеҥгыдемдышт.
«Марий Эл» газетым лудшо-влак, моло район дене таҥастарымаште, Морко кундемыште шуко. Тиде чот деч кораҥаш огыл манын, концерт годым меат подпискым эртарышна. Кок еҥ «Марий Эллан», икте «Сурт-печылан» возалтыныт. Нунылан пӧлекым кучыктенна.
А.Байкова.
А.Титовын фотожо.
