«Мо лийшашым палем гын, олымым шаралтем ыле», — ойлат калыкыште. Чынак, ме, тыглай еҥ-влак, шукынжо ончыкыжым илышыштына мо лийшашым огына пале. Уда лийме дечат моткочак утаралт коднена. Но тидымат кузе ыштыман – палышаш ыле, шонена. А вет южо специалист полшен кертеш. Ик тӱшкаже – астролог-влак. Нуно, шӱдырым ончен, чылажымат радамлен пуат.
Мутлан, астролог Стелла Астер лу ий наре еҥ-влаклан илышыштым сай велыш вашталташ полшаш тырша. Тудын денак таче лишкырак палыме лийына. Тыгак эрла мом ышташ кӱлмӧ нерген каласкалена.
— Стелла, тӱҥалтышлан астрологий кузе кумылдам савырен кертме дене палдарыза. Те вет вигак тыгай специалист лийын огыдал…
— Уке, вигак огыл. Ийготем эше кугужак огыл гынат, илышемже оҥай лийын. Мый ӱмырем мучко творческий шӱлышан айдеме лийынам: муренам, куштенам, почеламутым, мурым, йомакым возенам, савыктенам. Сцене илышем моткочак поян да сай лектышанак ыле. Фестиваль ден конкурслаште жюриштат лийынам. Ик жап йот элыштат иленам да тунемынам. Тиде – кӱчыкын ойлаш гын. А радамлынрак палдараш гын, Йошкар-Оласе ик школын 9-ше классше деч вара Палантай лӱмеш музыкальный училищыште калык инструмент отделенийыште тунемынам. Тылеч вара Яковлев лӱмеш Чувашийысе кугыжаныш педагогический университетын музыкально-педагогический факультетшым пытаренам. Тиде жапыштак туштак эше хореографлан тунем лектынам. Тылеч вара Чебоксарыштак хореограф семын пашам ыштенам: спортивный стиль гыч тӱҥалын, современный направлений марте коллективем-влак лийыныт. Вараже шочмо Йошкар-Олашке пӧртылынам да эрвел куштымаш дене ик эн ончыч коллектив-влакым чумыренам. Ик жап гыч фламенко куштымашке кусненам. Тидлан лӱмынак Москваште тунемынам. Тунам шкемын «Дежа вю» шоу-балетем лийын. Семымат, почеламутымат шкеак возенам да эстрадыште выступатленам. Умбакыже лачшымак почеламутым возымем шуын. Нуныжо тунар шочыныт – ик сборникым веле огыл савыктен луктынам, усталык вашлиймашым, тематический кас-влакым эртаренам. Но илышем мучко мо мылам келшен гын, эре икмыняр йодышлан вашмутым кычалынам: молан мый чылтшак весе-шамыч гай омыл? Ты тӱняшке ме молан толына? Мый могай сомылым шукташ толынам? Тидын нерген иктаҥашем-влак деч ятырлан ончыч шонкалаш тӱҥалынам.
— Тыге Те астрологийлан да тунамак психологийланат шӱмаҥында.
— Туге. Психологий дене тӱрлӧ книгам моткочак эр лудаш, илышым, мо да молан лачшымак тыге, а вес семын огыл лиймым, энергетике, илыш законым, шуко молым шымлаш, рашемдаш тыршаш тӱҥалынам. Вараже тиде палымем дене весе-влакым палдарымем шуын. Кеч ты пашам иктаж-кунам шукташ тӱҥалам манын, нигунам шоналтенат кертын омыл. Но илыш шкеже мыйым тидым ышташ тупем гычак пуйто шӱкен да ойлен: «Ыште. Тиде – тыйын ты тӱняште шуктышаш пашат». Туге гынат тыге ышташ кӱлмылан кужу жап ӱшанен кертын омыл. Сандене тӱрлӧ источникым онченам, тергенам. Но кунам умыленам: тиде – мыйын корнем, илышем, мылам пуалтше вий, мастарлык, пӧлек – тидым шуктыде кертын омыл. А кеч-мом ыштымыж годымат айдеме эн тӱҥжӧ пиалан лийшаш. Пиал, мыйын шонымаште – тиде илышыште шке верым мумаш, шуктымо пашат йодмаш дене пайдаланыже, тылат куаным кондыжо, вийым пуыжо, чапландарыже, весе-влаклан пайдале лийже, илышыштым сай велыш вашталташ полшен кертше. Санденак мый ынде лу ий наре еҥ-влаклан астролог да психолог семын консультацийым пуэм, туныктем, тренинг рӱдерыштем тренингым эртарем. Келшен толшо шинчымашем уло: кумшо кӱшыл образованием тидын денак кылдалтын: Москвасе социальный академийыште психологий дене преподавательлан, социальный психологлан тунем лектынам. Специализациемже «телесно ориентированный терапевт» маналтеш. Тиде – шижмаш дене кылдалтше чогашыл ишыкталтмашым кап дене пашам ыштыме гоч кораҥдымаш. А чогашыл чот ойгырымылан, тургыжланымылан кӧрат ишалт кертеш.
Чыла тиде шинчымашем иктыш ушен, еҥ-шамычлан кертмем семын полшаш тыршем. Тыште кажне посна еҥлан натальная карта манмым ыштыме кугу эҥертышыже лийын кертеш. Тушто чылажат рашемеш: айдемылан илышыжым сай велыш вашталташ манын, могай шӧрынжым вияҥден колтыман, тидлан мом ыштыман да тулеч молат. Кӧ ыштыктен гын, кызытат таум ойла.
Тукымвож кыл денат пашам ышташ, тудым саемден колташ лиеш. Мут толмашеш каласаш гын, Марий Эл – зодиак почеш Рак да астрологий дене келшышын тукымвожлан, йӱлалан, мемнам вож семын кузе «пукша», вияҥда, лачшымак тудлан «мутым куча».
— Ынде шушаш жап нерген мутланымашке куснымо шуэш. 21 гыч 22 март йӱдым марий календарь почеш У ий, Шордо ий, толеш. А 20-21 мартыште – астрологический у ий. Кӧ тыглай У ий годым, 31 декабрь гыч 1 январь йӱдым, шонымашыжым каласен огыл гын, тидым кызыт ыштен да тудо илышыш пурыжо манын, иктаж-могай йӱлам ала шуктен кертеш?
— «Кечылан планым ме эрдене ыштена, а идалыклан – шошым», — тыгай китай калыкмут уло, вет лачшымак шошым астрономический астрологический у ий шуэш. Сандене кӧ тӱрлӧ амал дене У ий йӱдым шонымашыжым возен да «тӱняшке» колтен огыл гын, тидым, чынжымак, кызыт ыштен кертеш. Адакшым кызыт тидым ышташ утларак сайрак да пайдалыкрак лиеш. Астрологий велым, лач тиде йӱдым, 12 шагатат 58 минутышто 26 секундышто, у зодиакальный цикл, Идалык орава тӱҥалеш. Сандене тиде – моткочак кугу виян жап. Илышда сай велыш вашталтше, утларак пиалан лийже манын шонеда гын, йӱд улмым, малыме шумым шотыш налде, шкешотан йӱлам эртарен кертыда. Но ты У ийым тыглай У ий пайрем семын шампанскийым йӱын, веселитлен, кугу йӱк-йӱаным луктын огыл эртарышаш улына, а чылажымат моткочак шонен, шот дене ыштыман.
Тидланак ты йӱд деч икмыняр кече ончычак, 15 март гыч тӱҥалын 20 март марте, шкем ямдылышаш улына. Нине кечым «дни обнуления» маныт. Тиде вич кече жапыште ме капна ден чоннам у энергийым пурташ ямдылышаш улына. Сандене нине кечылаште неле кочкыш радамыш пурышо йӧрвар дене сийлалташ тыршыман огыл. Кумылдам волтышо еҥ-влакым проститлыман. Шке иктаж-кӧм шоненак але шоныде сырыктенда гын, проститлаш йодман. Эртыше, шеҥгелан кодшо деч утлаш тыршыман, а тудлан «ала эше чылажат сай лиеш» манын шонен, «кержалташ», кучен кодаш тыршыман огыл. Кеч, огына шылте, тидым ышташ моткочак неле. Парымда уло гын, пӧртылтыман. Тӱҥалме да мучаш марте шуктыдымо пашам пытарыман. Пӧрткӧргым, сурт-оралтым эрыкташ гын, моткочак сай. Кӱлдымӧ да пайдаланыдыме арвер ден ӱзгар деч утлыман. Нине кечылаште нимогай у пашам тӱҥалаш огеш темлалт. Тыгак шкан утларак жапым ойырыман да Юмылан кумалман, молитвам лудман, ончыкылык нерген шонкалыман, илышын моткочак шерге улмыжым умылаш да аклаш тыршыман. Телевизорым шагалрак ончыман, лийме семын Интернет дене шагалрак пайдаланыман.
— Чыла тидыже шкем уда увер деч аралаш манын ышталтеш?
— Туге. У илышым тӱҥалаш вийым шукырак погаш, тудым арам пытараш огыл манын, шагалрак мутланаш тыршыман. Нигӧ дене ӱчашыман, вурседылман огыл. Чыла тидым кум кече ончычак шотыш налаш тӱҥалаш гын, пайдаже утларак лиеш.
У илышым яндар капкыл дене тӱҥалаш келшен толеш. Тидлан у цикл тӱҥалме деч ик шагат ончыч, а тиде пелйӱд деч изиш ондакрак лиеш, лектеш, капым мушман. Тидлан душ йымалне шогашат, ванныйыште киен лекташат, мончашке пурашат лиеш. Тылеч вара ару мотор йымал вургемым чийыман да 12 шагатат 58 минут жапыште, сортам чӱктен, эн кугу шонымашым каласен, Кӱшыл вий деч тудым шукташ, тыгак шкан да лишыл еҥ-влаклан идалык мучко полышым пуаш, аралаш йодман. Ӱшаныза, йодмыда шукталтеш!
Икманаш, шкем кузе ямдыледа, кузе чылажымат шонен ыштеда, тугай ончыкылыкда лиеш. Ончыч, шонымаш шукталтше манын, тудым ойлаш кӱлын гын, кызыт шоналтымат сита. Тугай ме виян жапыште илена. Кажне мутым шонен ойлыман, маныт. Но кызыт тыгай калыкмутат шочын: «Шоналтымет деч ончыч шоналте». Вес семынже, мутым веле огыл, шонымашетымат эскере – чылажат шукталтеш! Шукынжо тидым огыт умыло, а кӱлеш, вет тиде тый шке шонымашет дене илышетым сайракым але ударакым ыштет. Уда лиймаште иктат титакан огыл. Шке гына. Ала-кунам тыге шоналтенат, сандене илышыштет тиде лийын. Сай вашталтыш палдырна – адакат шканетак гына таушто.
— Пайдале каҥаш-влаклан моткочак кугу тау! Лудшына-влак тидым шотыш налыт да ончыкыжым илышышт сайрак да пиаланрак лиеш манын ӱшанен кодына.
Пагалыме лудшо-влак, кӧн Стелла Астер дене вашлийын мутланымыже, ой-каҥашым налмыже шуэш, «Формула счастья» астрологий рӱдерышкыже миен кертеш.
Лекше йодышым 8 967 757 14 13, 38 84 13 номер дене йыҥгыртен рашемдаш лиеш. Тыгак тыгай адрес дене кылым ышташ йӧн уло: https://vk.com/club38125787
Любовь Камалетдинова мутланен.
Рекламе шотеш.
