Мошенничествын тӱрлӧ лийын кертмыж дене палдарыме, тыгай сынан осал корныш шогалме деч аралыме шот дене Кужэҥер районышто йоча ден подростко-влак коклаште «Шкендым ондалаш ит пу» сӱрет конкурс эртен.
Тудым Россий МВД-н 5-ше №-ан «Сернурский» полиций пӧлкаж дене пырля Кужэҥер районысо образований да самырык-влакын пашашт шотышто отдел эртареныт. Конкурсышто 37 тунемше шке мастарлыкшым терген.
22 майыште «Сернурский» полиций пӧлкан начальникше, полицийын подполковникше А.Андреев сеҥыше-влаклан дипломым, шергакан пӧлекым да шере призым кучыктен, мероприятийыште участвоватлыше-влаклан отделыште экскурсийым эртарен.
Сӱрет конкурсышто сеҥыше-влакын пашашт дене полиций пӧлкаште стендым сӧрастарыме.
М.ИВАНОВА.
