Роспотребнадзорын Марий Элысе виктемжын увертарымыж почеш, рушарнян, 12 апрельыште, у коронавирус инфекций дене авалталтше-влакын чотышт шым еҥлан кугемын да чылаже 70 марте шуын. Таче, 13 апрельыште, COVID-2019 дене черланыше эше 10 еҥым рашемдыме да республикыштына чумыржо 80 еҥын коронавирусан улмыжым официально пеҥгыдемдыме.
– У коронавирус инфекций дене авалталтше еҥ-влакын чотышт кечын гаяк кугемын толмылан ӧрманат, лӱдманат огыл. Мӧҥгешла, черланыше-шамычым тыге писын рашемдымым сай велым аклыман, – умылтара Роспотребнадзорын Марий Элысе виктемжым вуйлатыше Светлана Булатова. – Тидыже эн ончычак виктемын оперативно пашам ыштымыж нерген ойла. Ме инфекциян верлам жапым шуйкалыде рашемдена да тудым калыклан лӱдыкшыдымыш савырена. Угыч рашемдыме коронавирусан чыла еҥ тымарте черланыше родыжо, йолташыже але палымыж дене кылым кучен. Тидыже инфекцийын юж-чӱчалтыш да лишыл кыл гоч куснымыжым эше ик гана пеҥгыдемда. Сандене таче посна улмо режимым шукташ, социальный дистанцийым кучаш, личный гигиеным эскераш, маскым чияш, дезинфицироватлыше средствыла дене пайдаланаш, илыме да паша верлам эрыкташ кӱлешак.
Калыкым у коронавирус инфекций дене черланен кертмылан тергаш тӱҥалме жап гыч таче кече марте 8319 шымлымашым эртарыме.
Кызыт 923 еҥым, ты шотыштак у коронавирус инфекций дене черланен кертше дене кылым кучышо 835 гражданым, медицине велым эскерат. Учёт гыч 2128 еҥым, ты шотыштак 53 гражданым, кораҥдыме.
М.ИВАНОВА
