Российыште чыла еҥлан у коронавирус инфекций деч прививкым ыштыме кампаний тӱҥалмылан лу кечат эртыш. Тиде жап мом ончыктыш? Эн ончычак – шуко еҥын вакцинироватлалташ кумылан улмыжым да прививкым лӱдде ыштыктымыжым. Нунын коклаште «Марий Эл» газет редакцийна гыч бухгалтер Лариса Ивановам (снимкыште), корректор-влак Ирина Хафизова ден Роза Юдинамат палемдаш лиеш. Коллегына-шамыч шучко чер деч прививкым кампаний тӱҥалме икымше кечынак Йошкар-Оласе 2-шо №-ан поликлиникыште ыштыктеныт.
— Мо шкемым шарнем, национальный календарьыште палемдыме ма сезонныйлан шотлалтше чыла прививкым жапыштыже ыштыкташ тыршем, — каласкала Лариса Васильевна. – Шканем веле огыл! Тазалыкым аралыме системын тиде услугыж дене ешге пайдаланена.
У коронавирус инфекций деч прививкым чыла еҥлан ышташ тӱҥалме нерген уверым колмеке, моткоч йывыртышым. Тидлан амалжат уло: лишыл жапыште Российын ик кугу олашкыже паша дене миен толнем, отпускышто йот элыште канынем… Тыштыжат-туштыжат COVID-19 дене черланыше-влакын чотышт моткоч кугу, сандене шкем веле огыл, молымат шучко инфекций деч аралаш кӱлмым сайын умылем. Тыге, 13 январьыште Йошкар-Оласе 2-шо №-ан поликлиникыш йыҥгыртышым да вакцинироватлалташ шонымем каласышым. Мыйым спискыш пуртышт да лишыл жапыште йыҥгырташ сӧрышт. Чынак, кумшо кечын йыҥгыртышт, ампулысо вакциным кок шагат жапыште вич еҥлан кучылт пытараш кӱлмым каласышт. Мый прививкым ыштыкташ кумылан вич еҥым вашке муым, тиде тӱшкашке авамат пуртышым – илалше еҥым поснак аралаш кӱлеш, шонем.
18 январь эрдене визытынат поликлиникыш мийышна. Медицине тӧнежын у семын пашам ыштымыже вигак шижалте: шочмо гынат, регистратурыш ончычсо гай кугу черет уке, сандене ме, жапым шуйкалыде, врач деке логална. Тудо кажнынам кӱлынак тергыш: капкыл температурым, вӱрысӧ кислородын сатурацийжым висыш, сайын колышто, тазалыкна нерген йодышто… Прививкым ыштыме кабинетыште медсестра ампулым морозильник гыч ончылнынак лукто. Вакцинын шулымыжым иктаж лучко минут вучышна. Укол деч вара икмыняр жап гыч пашашке кайышна. Авам гын тушто эше пел шагат лийын.
Прививкым ыштыктыме деч вара тазалыкыштем нимогай вашталтышым шым шиж, уколын верже гына изишак корштыш. Ынде вакцинын кокымшо компонентше дене прививкым ыштыкташ ӱжмым вучем.
М.ИВАНОВА
Авторын фотожо
