УВЕР ЙОГЫН

Шер гыч пеледыш чеверракын пеледеш…

 

Пӱрымаш пӱм пудыртен пура маныт калыкыште. Шочмо годым кажныжлан тудо мом ямдыла, палаш ок лий. Илыш кужу, тӱрлыжат лиеш. Таза шочшо азат, илен-толын, инвалид лийын кертеш. Илышыште лийше неле-йӧсым чытен лекташ кӧргӧ вий-куат кажныжлан кӱлеш. Эн нелыже, илышлан куанен моштымо койышым йомдараш огыл, очыни.

Параньга район Ондропсола ялыште илыше Галина Максимовна Антропова кок шочшо гыч Алёна ӱдыржо тазалык шотышто начарак лиеш манын шонен мо. Но тиде ӱдырым виянракым гына ыштен. Чыла тыге лиймылан аван чонжо тачат коршта.

Алена кумло ийым вончен. Тӱжвал сынже эшеат пеш самырыкын коеш. Антроповмытын суртышкышт пурет да ончерыш логалмыла чучеш. Чыла вере манаш лиеш, Алёнан шер гыч ыштыме кидпашаже-влак. Сылне деч сылне тӱрлӧ пеледыш композиций-влак. Кажныжым ышташ мыняр жап кӱлын, тогдаяш гына кодеш. Алена эше сайын сӱретла. Оригами йӧн дене кагаз гыч ыштыме кайыкомбо-влакат шӧрлыкыштӧ ийыт. Кайыкомбыжым Алена ик эн ончыч ышташ тунемын. Вара веле шер гыч ыштыме кидпашаш куснен.

Галина Максимовна ӱдыржын эн ӱшанле йолташыже. Чыла шотыштат Алена тудлан эҥертен кертеш. Мотор, ласка, тыматле ӱдыр шукыжо ок мутлане. Шке нергенжат йӧршеш нимом ок каласкале. Но тудым аваже сайын умыла. Шке илышыжым оҥайракым ышташ манынак, очыни, Алена тӱрлӧ кидпашалан тунемын. Пытартыш жапыште алмаз мозаике сӱретымат ышташ кумылаҥын.

А эше тудо тӱрлӧ кочкышым ямдылаш йӧрата, у деч у рецептым кычалеш. Пайрем еда ыштыме тортшымат лишыл еҥже-влак моктат. Сай пелаш лиеш манын пеНгыдын каласен кертеш.

Кеҥежым гын Алена эре садпакчаште. Тӱрлӧ кушкылым, пеледышым ончен кушта. Кудывечыштышт могай гына пеледыш ок пелед. Ӱдыр ончылгоч нӧшмым налын, шындаш ямдыла. Пӧрт окна-шамычымат тудын кӧршӧклаште ончен куштымо пеледыш сӧрастара.

С.Носова

М.Скобелевын фотожо

 

Опубликовать в Одноклассники

Добавить комментарий