САМЫРЫК ТУКЫМ

Шергакан еҥнан пайремже

1 октябрь – илалше-влакын кечышт. Коча-коваланда нуным йӧратымыда, пагалымыда нерген  ойлаш эше ик амал. Тугеже таче нуным шокшын-шокшын ӧндалза да тендан верч тургыжмыштлан тауштыза. А мом самырык-влак шке коча-ковашт нерген ойлат – айста пален налына. 

Роза Иванова, Морко район:

– Мыйын ковам Мария Янситовна Николаева. Тений тудлан 83 ий темын. Тудо  пеш шыма да уста. Моткоч сылне почеламут-влакым воза. Илалше гынат, пеҥгыде кап-кылан ӱдырамаш.

Ковамын йоча годсо жапше нерген каласкалымыжым колышташ йӧратем. Ятыр жап акушерлан пашам ыштен, верысе ФАП-ын вуйлатыше-фельдшерже лийын.

Ковам уналыкеш толеш гын, ме пырля тоштерыш, театрыш коштына. Тудо мыйым искусствым да медициным йӧраташ кумылаҥден.

Инна Гусянова, Курыкмарий район:

– Коча-ковам нерген кугурак-влакын ойлымышт гыч веле палем. Ковам пеш поро, шыма лийын маныт. Тудо  кӱсле дене моткоч сылнын шоктен. Тидланже нигуштат тунемын огыл гынат, мастарлыкше музык грамотым палыше еҥ деч ойыртемалтын огыл. Кочам кидпашалан уста лийын. Коҥгамат оптен моштен.

Ме, самырык-влак, илалше-шамычым пагалышаш улына.

Марина Скуратова, У Торъял район:

Кова дене эртарыме жапым порын шарнем. Йочам годым тудлан концертым ончыктем ыле. Окна сакыш шеҥгеч лектын, такмак-влакым мурен, куштенам. Кугурак лиймеке тудын деке сурт сомылым ышташ полшаш коштынам. Яра жап годым тӱрлӧ нерген кутыркалыме. Тудо кӱлеш ой-каҥашым пуэн мошта ыле.

Самырык ӱдыр-рвезе-шамычлан шке коча-кова дене жапым утларак эртараш кӱлеш. Илалше-влакын илыш опытышт кугурак, кӱлеш годым шомакышт денат полшат. Нунылан кызыт жапым эртарен, кутыркален шинчаш поро йолташ-влак кӱлыт. Ваш кылым йомдарыман огыл, лач тыге ме тукым вожнам арален коден сеҥена.

О.МОШКИНА

Опубликовать в Одноклассники

Добавить комментарий