Роспотребнадзорын Марий Элысе виктемже шаурмам ыштен ужалыше организаций-влакым 2018 ий тӱҥалтыш гыч 4 гана терген да ятыр ситыдымашым рашемден.
Таче кечылан регионыштына шаурмам 19 амалкалче ден фирме ыштен ужала. Кугу лӱдыкшан объектлан шотлалтше нине предприятийым тергыме годым чыла вережат СанПиН-ым пудыртымым рашемдыме, а лачшымак: ямде кочкышым аралыме жап ден условий пудырталтыт, оборудованийын инвентарьышкыже келшыше маркировко огеш шындалт, атышӧрым мушмо режим огеш шукталт, полуфабрикат ден ямде кочкыш тӱжвал тӱсышт да тамышт шотышто огыт аклалт. Тылеч посна пашаеҥ-влак медосмотрым огыт эрте да гигиенылан огыт тунем.
Шаурмам ямдылыме объект-влакым тергыме деч вара амалкалче-шамыч шотышто административный правам пудыртымо нерген вич делам тарватыме, 50 тӱжем утла теҥге кугыт штрафым пуымо нерген пунчалым лукмо.
Пытартыш кум ий жапыште СанПиН-ым пудыртымылан суд Роспотребнадзор виктемын материалже негызеш шаурмам ыштен ужалыше 4 предприятийым 20 гыч 90 сутка марте петырен: иктым – Йошкар-Олаште, коктым – Волжскышто, иктым – Советский посёлкышто.
Шаурмам ыштен ужалыше предприятий-влакын ситыдымашыштым Роспотребнадзор шке контрольышкыжо налын.
М.ИВАНОВА.
