Йошкар-Оласе Первомайский уремын 173-шо ден 175-ше №-ан пӧрт коклаштыже ик оҥай памятник уло. Тудым 1970 ийыште Марий автономийым ыштымылан 50 ий темме лӱмеш шогалтеныт улмаш. Такшым Йошкар-Олаште чылаже 50 утла памятник ден бюст уло. Южыжо республик кӱкшытан монументальный искусство памятниклан шотлалтыт. А тиде памятник 48 ий шоген гынат, тӱвыра да историй памятник радамыш пурталтын огыл. Санденак, очыни, тӱжвал сынже йӧршеш шапалген. Тидымак шотыш налын, Йошкар-Ола администраций тудым тений 1 октябрь марте шотыш кондаш пунчалын. Тидлан шийвундымат, тудым олмыктышо-влакымат муыныт. Теве ынде тудо йӧршеш у сыным налын.
Стеллыште 50 цифрым ончыктымо. Тиде — автономийын лӱмгечыжым ончыктышо пале. А йымакыже марий орнаментым келыштарыме. Ӱлныракше сорла ден чӧгыт ончыкталтыныт. Тиде шке жапыштыже совет калыкын лийше кугыжаныш эмблемыжым ушештара. А стелын кӱшыл ужашыштыже вераҥдыме. Тушто возалтын:
| Декрет Всероссийского Центрального Исполнительного Комитета и Совета Народных Комиссаров об образовании автономной области марийского народа Всероссийский Центральный Исполни- тельный Комитет и Совет Народных Комиссаров постановляют Образовать автономную область марийского народа Председатель Всероссийского Центрального Исполнительного Комитета М. Калинин Председатель Совета Народных Комиссаров В.Ульянов Ленин. 4 ноября 1920» 4 ноябрьыште палемдалтше Марий автономийын лӱмгечыже вашеш мэрийын оласе калыклан тыгай пӧлекым ыштымыжлан таушташ гына кодеш. С.Носова. Снимкылаште: олмыктымо деч ончыч памятник тыгай лийын; кызытсе у сынже. М.Скобелевын фотожо. |
