| 14-19 майыште «Стоп ВИЧ/ СПИД» всероссийский акций кудымшо гана эрта. Тудын кышкарышкыже кум направленийым: «ВИЧ нерген пален налме арням», «ВИЧ-лан тестироватлалтме арням» да «ВИЧ дене чолган кучедалме арням» – пуртымо.
Акцийын тӱҥ задачыже – айдеме тукымын тӱткышыжым ВИЧ-инфекций ден СПИД темылан ойыраш, ВИЧ-ын куснылмо корныжо, чер пижме деч аралалтме йӧн, инфицированийын диагностикыже, вияҥме лӱдыкшыжӧ да моло нерген палдараш. Таче Российыште ВИЧ-инфекциян 900000 утла еҥ ила. Черланыме у случай-влакым шагалемдаш да вараже йӧршын чараш манын, Российын правительствыже кугыжаныш стратегийым пеҥгыдемден. Тудын тӱҥ задачыже-влак кокла гыч иктыже – калыклан ВИЧ-инфекций дене кылдалтше йодыш-шамычым умылтараш. Кызыт Марий Элын СПИД-рӱдерыштыже ВИЧ-инфекциян 1362 еҥ, ты шотыштак 14 йоча, эскералтеш. Эпидемий историйыште ВИЧ деч 489 еҥ колен, СПИД деч – 124 еҥ. Иктешлен каласаш гын, регионыштына ВИЧ шотышто сӱрет моткоч уда. Тудын дене черланыме случайым регионнан кажне муниципальный образованийыштыже регистрироватлыме, но Волжск олаште – поснак шуко. Тидымат ушештарен кодаш кӱлешан: 2018 ийыште ВИЧ дене черланыме амал тӱҥ шотышто, 70 процент случайыште, половой корно дене кылдалтын. «Стоп ВИЧ/СПИД» всероссийский акций ВИЧ/СПИД деч колышо-влакым шарныме тӱнямбал кечылан пӧлеклалтын. Тыге, 19 майыште ВИЧ/СПИД дене черланымылан кӧра илыш гыч кайыше-влакым шарналтат, эпидемийын оптышышкыжо логалше-шамычлан полшат, калыклан ВИЧ-ын лӱдыкшыж нерген каласкалат. Марий Элыште ВИЧ-лан шуматкече да рушарня деч моло кечын 8 гыч 16 шагат йотке Йошкар-Ола, Келшымаш урем, 95-ше пӧрт адрес дене верланыше СПИД-рӱдерыште яра тергалташ лиеш. Регистратурын телефон номерже: 63-05-80. Ӱшан телефон: 23-20-44. М.ИВАНОВА |
