Россий президент Владимир Путинын коронавирусан пациент-шамыч дене пашам ыштыше медик-влаклан кумылаҥдыше выплатым тӱлымӧ нерген указшым сайлан шотлем.
Мый Волжский районысо Памар села гыч улам, Мурманск областьысе Гаджиево олаште Военно-морской клинический госпитальын терапевтический отделенийыштыже медсестралан пашам ыштем. Медицине организацийыштына поснак лӱдыкшӧ инфекций шотышто тунеммаш ий еда эртаралтеш, сандене у коронавирус инфекций гай шучко чер дене кучедалаш персонална эре ямде. Тыгеат лиеда, радиаций лӱдыкшӧ улмо годым подводник-шамычым пирсыште шкем аралыме общевойсковой костюм дене вашлийына. Икана тыгай вургем дене ик сутка кошташ логалын, кочде-йӱде… Шылтыде ойлем, пеш неле, но илымет шуэш гын, чыла чытет улмаш…
Коронавирусан пациент-влак дене пашам ыштыше медик-шамыч противочумный манме костюм дене пел сутка коштыт. Йӧндымӧ гынат, памперсым чият, тудым нӧртат, амыртатат… Да пич вургемыште каласен мошташ лийдыме орлыкым чытат! Тидым тыглай еҥ огеш уж, огеш шиж да огешат пале… Сандене нине медик-шамычым аклыде, шкем чаманыде ыштыме пашаштлан тауштыде огешак лий. Адакше ешарен тӱлымӧ кеч-могай окса – пашам эшеат сайын ышташ таратыше амал. Выплате регион кӱкшытыштат лачшымак адресат деке да тичмашын миен шуэш гын, пеш сай ыле.
О.ПЕТРОВА
