«Здравоохранений» национальный проектын «Икшыве-влаклан медицине полышым пуашлан кызытсе жаплан келшыше инфраструктурым ыштен, йоча здравоохраненийым вияҥдымаш» национальный проектшым илышыш пуртымо кышкарыште Республиканский йоча клинический больницыш компьютер томографым шындыме.
Тыгай аппаратур регионысо йоча медицине тӧнежлаште тымарте лийын огыл, сандене изи пациент-влакым кугыеҥ-шамычын больницыштышт верланыше томографыш коштыкташ логалын.
– Томографым «Филипс» компанийын ончыл технологийже почеш ямдылыме, – каласкала рентген отделенийым вуйлатыше В.Иванов (снимкыште). – Тыште, йочан ойыртемжым шотыш налын, облученийын дозыжым келыштараш йӧн уло. Сӱретын качествыжат моткоч чапле. Аппарат суткаште 25 шымлымашым эртарен кертеш. Но ме кызытеш кечыште вич йочам веле тергена. Октябрь кыдал гыч томограф гоч 28 йоча эртен.
Шергакан оборудованийлан верым ямдылыме паша кужу жапым налын. Кодшо ийын проект-смете документацийым ыштыме, тений торгым эртарыме да кабинетым олмыктымо, тыгодым электролампым, вентиляцийым да радиаций излучений деч аралыше системым вашталтыме. Тиде пашам республикын бюджетше гыч ойырымо окса дене шуктымо.
– Ме поснак Тазалыкым аралыме министерствын лучевой диагностике шотышто тӱҥ внештатный специалистше Леонид Семенович Агроскинлан тауштена, – манеш Республиканский йоча клинический больницын тӱҥ врачше Д.Груздев. – Тудо мыланна оборудованийым шындыме годым моткоч шуко полшыш, пашам ыштыме кажне йыжыҥыште консультацийым пуыш, кызытат кӱлмӧ годым томограммым лончылымаште участвоватла. У оборудований дене пашам ышташ кок рентгенологым ямдылыме, лишыл жапыште эше ик специалистым туныкташ палемденна.
Республиканский йоча клинический эмлымверыш шындыме томограф регионышто илыше чыла икшывым обслуживатла. Тидланже Марий Элын кажне районжылан, стационарлаште да амбулаторийлаште эмлалтше йоча чотым шотыш налын, шымлымашлан квотым пуат.
М.ИВАНОВА
Фотом Марий Элын Тазалыкым аралыме министерствыжын фотогалерейже гыч налме
