Тений Марий кугыжаныш университетыш тунемаш пураш чылаже 8007 йодмаш лийын, тышеч бакалавриат ден специалитетыш – 6902.
Шинчымаш кечылан пӧлеклалтше мероприятий тений Роспотребнадзорын йодмашыже-влакым шотыш налын эртен: участник-влак маске дене лийыныт да икте-весе коклаште социальный дистанцийым кученыт. Икымше курсыш толшо-влакым студент билетым налмышт дене шукыжым видео-формат йӧн дене саламленыт. Национальный тӱвыра да культур кокласе кыл институтын омса лондемжым икымше гана вончышо-влакым ты гана Совет Федерацийын тӱнямбал паша шотышто комитетшын председательже, МарГУ-н почётан професссоржо Константин Косачёв саламлаш миен. Тудо студент билетым кучыктен да «Тӱнямбал политикым вияҥдыме кызытсе тенденций» темылан лекцийым лудын.
1 сентябрь вузын Цифран технологий у институтланже кок пачаш пайрем лийын. Икымше курсыш толшо-влаклан онлайн йӧн дене университетын шанче да инноваций паша шотышто проректоржо Анатолий Леухинын «Цифран технологий институт шанче направленийже» теме дене лекцийже лийын.
Официальный ужаш деч вара студент-влакым спорт пайрем вучен.
Г.КОЖЕВНИКОВА
